കോഴിക്കോട്: ദ്വിരാഷ്ട്ര ഉടമ്പടി ലംഘനത്തെ തുടര്‍ന്ന് 150 മലയാളികളടക്കം 200 ഇന്ത്യക്കാരാണ് ഖത്തര്‍ ജയിലുകളില്‍ കുടുങ്ങിക്കിടക്കുന്നതെന്നും ഇവരുടെ മോചനത്തിന് കേന്ദ്ര സംസ്ഥാന സര്‍ക്കാരുകള്‍ അടിയന്തരമായി ഇടപെടണമെന്നും ഖത്തര്‍ എന്റര്‍പ്രണേഴ്‌സ് ആക്ഷന്‍ കമ്മിറ്റി ഭാരവാഹികള്‍ വാര്‍ത്താസമ്മേളനത്തില്‍ ആവശ്യപ്പെട്ടു. ഖത്തറില്‍ നിക്ഷേപം നടത്തുകയും വ്യവസായ മേഖലയില്‍ പ്രവര്‍ത്തിച്ചുവരികയും ചെയ്തിരുന്ന 200 ഓളം ഇന്ത്യക്കാരാണ് ഖത്തര്‍ ജയിലുകളില്‍ കഴിയുന്നത്.

1999 ഏപ്രില്‍ മാസത്തിലെ ഖത്തര്‍ അമീറിന്റെ ഡല്‍ഹി സന്ദര്‍ശന വേളയില്‍ ഖത്തര്‍ സര്‍ക്കാരും ഇന്ത്യന്‍ സര്‍ക്കാരും തമ്മില്‍ നിക്ഷേപവുമായി ബന്ധപ്പെട്ട കേസുകളില്‍ നിയമപരമായ കാര്യങ്ങള്‍ ലളിതമാക്കാന്‍ 'ദ റസിപ്രോക്കര്‍ പ്രമോഷന്‍ ആന്‍ഡ് പ്രൊട്ടക്ഷന്‍ ഓഫ് ഇന്‍വെസ്റ്റ്‌മെന്റ്' എന്ന പേരില്‍ ഉടമ്പടി ഒപ്പുവച്ചിരുന്നു. കരാര്‍ പ്രകാരം ഖത്തറില്‍ നിക്ഷേപം നടത്തി ബിസിനസില്‍ ഏര്‍പ്പെടുന്ന ഇന്ത്യക്കാരുടെ കേസുകള്‍ തര്‍ക്കപരിഹാര വേദിക്ക് വിടുകയായിരുന്നു വേണ്ടത്.
എന്നാല്‍ സാമ്പത്തിക പ്രതിസന്ധിയെ തുടര്‍ന്ന് ഇത്തരം കേസുകള്‍ ക്രിമിനല്‍ കുറ്റമായി കണക്കിലെടുത്ത് നിക്ഷേപകരെ ജയിലില്‍ അടക്കുകയാണ് ചെയ്യുന്നത്. ഇത് ഈ കരാറിന്റെ ലംഘനമാണെന്നും ഇവര്‍ പറയുന്നു. ജയിലില്‍ അകപ്പെട്ടവരുടെ ഖത്തറിലുള്ള ആസ്തികള്‍ ഉപയോഗപ്പെടുത്തി അവരുടെ സാമ്പത്തിക ബാധ്യതകള്‍ പരിഹരിച്ച് നാട്ടിലേക്ക് മടങ്ങിവരാനുള്ള സൗകര്യമൊരുക്കാന്‍ ഇന്ത്യന്‍ സര്‍ക്കാര്‍ ഖത്തറിനുമേല്‍ സമ്മര്‍ദം ചെലുത്തണമെന്നും ഇവര്‍ ആവശ്യപ്പെട്ടു. വാര്‍ത്താസമ്മേളനത്തില്‍ പ്രജീഷ് തിരുത്തിയില്‍, ഫയാസ് കുതിരവട്ടം, പി. മോഹനന്‍, സന്തോഷ് പൂവ്വാട്ട്പറമ്പ്, എം.കെ ജനാര്‍ദനന്‍ പങ്കെടുത്തു.