പുല്‍പ്പള്ളി: മുള്ളന്‍കൊല്ലി പഞ്ചായത്തിലെ മരക്കടവ് പ്രദേശത്ത്കടുവാ ശല്യം വര്‍ധിച്ചതോടെ പ്രദേശത്തെ ജനങ്ങള്‍ ഭീതിയില്‍. കഴിഞ്ഞ ദിവസം പുഴയേരത്ത് മേയാന്‍ വിട്ട പൊന്നാരംക്കുന്നേല്‍ തങ്കച്ചന്റെപശുക്കളെ കടുവ പിടിച്ചിരുന്നു. ഇതേത്തുടര്‍ന്ന് വനം വകുപ്പ് അധികൃതരുള്‍പ്പടെ സ്ഥലത്തെത്തി പരിശോധന നടത്തി. തുടര്‍ന്ന് പശുക്കളെ ആക്രമിച്ച സ്ഥലത്ത് രണ്ട് കാമറകളും സ്ഥാപിച്ചു.  എന്നാല്‍ കടുവ കാമറയില്‍ പതിഞ്ഞില്ലെങ്കിലും പുഴയോരത്തെ മുളങ്കാടുകള്‍ക്കുള്ളില്‍ കടുവയെ ജനങ്ങള്‍ കണ്ടിരുന്നു. പ്രദേശത്ത് കൂടുകള്‍ സ്ഥാപിച്ച് ശല്യക്കാരായ കടുവയെ പിടികൂടാന്‍ വനം വകുപ്പ് തയാറാകണമെന്നാണ് നാട്ടുകാരുടെ ആവശ്യം.
കര്‍ണാടക വനത്തില്‍ നിന്ന് കബനിപ്പുഴ കടന്ന് എത്തുന്ന കടുവയാണെന്നാണ് സൂചന. കടുവാ ശല്യം വര്‍ധിച്ചതോടെ ജനങ്ങള്‍ക്ക് വളര്‍ത്തുമൃഗങ്ങളെ തീറ്റക്കായി പുറത്ത് കൊണ്ട് പോകാനും കഴിയാത്ത അവസ്ഥയിലാണ്.