ന്യൂഡല്‍ഹി: ഒടുവില്‍ ആംആദ്മിയ്ക്ക് ആശ്വാസം. ഡല്‍ഹി പട്പര്‍ഗഞ്ച് മണ്ഡലത്തില്‍ മാറിമറഞ്ഞ ലീഡ് നിലകള്‍ക്കൊടുവില്‍ ആം ആദ്മി പാര്‍ട്ടി സ്ഥാനാര്‍ഥിയും ഉപമുഖ്യമന്ത്രിയുമായ മനീഷ് സിസോദിയയും വിജയിച്ചുകയറി. ബി.ജെ.പിയുടെ രവീന്ദര്‍ സിംഗ് നേഗിയെയാണ് കനത്ത പോരാട്ടത്തിനൊടുവില്‍ സിസോദിയ പരാജയപ്പെടുത്തിയത്.

കോണ്‍ഗ്രസിന്റെ ലക്ഷ്മണ്‍ റാവത്ത് മത്സരിക്കുന്നുണ്ടെങ്കിലും കാര്യമായ സ്വാധീനം ചെലുത്താന്‍ കഴിഞ്ഞില്ല. വോട്ടെണ്ണലിനിടെ പല ഘട്ടങ്ങളിലും സിസോദിയ പിന്നില്‍ പോയിരുന്നു.
എന്നാല്‍ വോട്ടെണ്ണല്‍ അവസാന റൗണ്ടിലേക്ക് കടന്നതോടെ കാര്യങ്ങള്‍ മാറിമറിയുകയായിരുന്നു. നേരിയ ലീഡാണെങ്കിലും മനീഷ് സിസോദിയ മണ്ഡലം നിലനിര്‍ത്തി.

1998 മുതല്‍ 2013 വരെ കോണ്‍ഗ്രസിന്റെ ശക്തികേന്ദ്രമായിരുന്ന പട്പര്‍ഗഞ്ജിന്റെ ചരിത്രം മാറ്റുന്നത് സിസോദിയയാണ്. 1993ല്‍ ബി.ജെ.പിയായിരുന്നു മണ്ഡലത്തില്‍ ജയിച്ചത്.