മാനന്തവാടി: പൈപ്പ് പൊട്ടി കുടിവെള്ളം പാഴാവുകയും റോഡില്‍ ഗര്‍ത്തം രൂപപ്പെട്ടിട്ടും അനക്കമില്ലാതെ അധികൃതര്‍.
ശക്തമായി വെള്ളം പരന്നൊഴുകുന്നതിനാല്‍ പാലത്തിന്റെ സംരക്ഷണഭിത്തി തന്നെ തകരാന്‍ സാധ്യതയുള്ള നിലയിലാണ്. മാനന്തവാടി ചെങ്ങാടക്കടവ് ഗവ. വെക്കേഷണല്‍ ഹയര്‍ സെക്കന്‍ഡറി സ്‌കൂളിന് സമീപത്തുള്ള പാലത്തോട് ചേര്‍ന്നുള്ള കുടിവെള്ള വിതരണ പൈപ്പ് പൊട്ടിയാണ് ജലം പാഴാവുന്നത്.പാലത്തോട് ചേര്‍ന്നുള്ള റോഡില്‍ വന്‍ ഗര്‍ത്തവും രൂപപ്പെട്ടിട്ടുണ്ട്. എട്ട് ഇഞ്ച് പൈപ്പ് പൊട്ടി ശക്തമായ രീതിയില്‍ വെള്ളം പുറത്തേക്ക് തള്ളുന്നതിനാല്‍ ഗര്‍ത്തം വലുതാകാനും റോഡ് തകരാനും ഇടയുണ്ട്. പാലത്തിന്റെ അപ്രോച്ച് റോഡിന്റെ സംരക്ഷണഭിത്തിയുടെ ഇടയിലൂടെയാണ് പൈപ്പ് പൊട്ടി വെള്ളം ഒഴുകുന്നത്. തുടര്‍ച്ചയായി വെള്ളം ഒഴുകുന്നത് മൂലം സംരക്ഷണഭിത്തി തകരാനുള്ള സാധ്യത ഏറെയാണ്. അന്‍പത് വര്‍ഷത്തിലേറെ പഴക്കമുള്ള ചെങ്ങാടക്കടവ് പാലം നേരത്തേ തന്നെ അപകട ഭീഷണിയിലാണ്. ശക്തമായ രീതില്‍ വെള്ളമൊഴുകി റോഡിലെ ഗര്‍ത്തം വലുതാവുകയും സംരക്ഷണഭിത്തിക്ക് തകരാര്‍ സംഭവിച്ചാല്‍ പാലത്തിലൂടെയുള്ള വാഹന ഗതാഗതം തടസപ്പെടാനിടയുണ്ട്. കബനി പുഴയില്‍ നിന്നും പമ്പ് ചെയ്ത് കൂടല്‍ കടവ് പദ്ധതി വഴി വിതരണം ചെയ്യുന്ന പൈപ്പ് പൊട്ടി കുടിവെള്ളം കബനി പുഴയിലേക്ക് തന്നെയാണ് ഒഴുകി എത്തുന്നത്.
പൈപ്പ് പൊട്ടി വെള്ളം പാഴാവുന്നതിനാല്‍ തോണിച്ചാല്‍ അടക്കമുള്ള എടവക പഞ്ചായത്തിലെ ഭൂരിഭാഗം പ്രദേശങ്ങളില്‍ കഴിയുന്നവര്‍ക്കും കുടിവെള്ളം കിട്ടാത്ത അവസ്ഥയാണുള്ളത്. മാനന്തവാടി നിന്നും പനമരം, തരുവണ കല്‍പ്പറ്റ, പടിഞ്ഞാറത്തറ, നിരവില്‍പ്പുഴ, കോഴിക്കോട് എന്നിവിടങ്ങളുമായി ബന്ധിപ്പിക്കുന്ന റോഡിലെ പ്രധാന പാലമാണ് ചങ്ങാടക്കടവിലുള്ളത്. അധികൃതരുടെ അനാസ്ഥകാരണം പൈപ്പ് പൊട്ടി വെള്ളം ഒഴുകുന്നത് മൂലം അപകടാവസ്ഥയിലുള്ള പാലത്തിന് എന്തെങ്കിലും തകരാര്‍ സംഭവിച്ചാല്‍ ഗതാഗതം പൂര്‍ണമായും സ്തംഭിക്കും. ദിവസങ്ങളായി പൈപ്പ് പൊട്ടി വെള്ളം പാഴാവാന്‍ തുടങ്ങിയിട്ടും വാട്ടര്‍ അതോറിറ്റി അധികൃതരെ വിവരമറിയിച്ചിട്ടും യാതൊരു നടപടിയും ഉണ്ടായിട്ടില്ലെന്ന് നാട്ടുകാര്‍ പറഞ്ഞു.