ദമാം: ജോലിസ്ഥലത്തെ ദുരിതങ്ങളില്‍ നിന്നും രക്ഷപ്പെടാന്‍ വനിതാ അഭയകേന്ദ്രത്തില്‍ ആശ്രയം തേടിയ മലയാളിയായ വീട്ടുജോലിക്കാരി ഒടുവില്‍ നാട്ടിലേക്കു മടങ്ങി. ഏഴു മാസങ്ങള്‍ക്ക് മുന്‍പ് സ്വദേശിയുടെ വീട്ടില്‍ ജോലിക്കെത്തിയ തിരുവനന്തപുരം വിഴിഞ്ഞം സ്വദേശിനിയായ മേരി ഹെലനാണ് സുമനസ്സുകളുടെ സഹായത്തോടെ അഭയകേന്ദ്രത്തില്‍ നിന്നും മോചിതയായത്. കടുത്ത ജോലി ചെയ്ത് ശമ്പളം ചോദിച്ചപ്പോള്‍ നാലു മാസത്തിനു ശേഷം വെറും രണ്ടു മാസത്തെ ശമ്പളം മാത്രമാണ് നല്‍കിയത്. തുടര്‍ന്ന് ദുരിത കഥയറിയിച്ചപ്പോള്‍ ജോലിക്ക് കൊണ്ടുവന്ന ഏജന്റും കൈ മലര്‍ത്തി.

ഒടുവില്‍ വീട്ടുകാരറിയാതെ പുറത്തു കടന്ന് അടുത്തുള്ള പൊലിസ് സ്റ്റേഷനില്‍ പോയി പരാതി പറഞ്ഞതിനെ തുടര്‍ന്ന് പൊലിസ് അവരെ ദമാമിലെ വനിതാ അഭയകേന്ദ്രത്തില്‍ കൊണ്ടു ചെന്നാക്കുകയായിരുന്നു. തുടര്‍ന്ന് ജീവകാരുണ്യപ്രവര്‍ത്തകര്‍ സ്‌പോണ്‍സറെ ബന്ധപ്പെട്ടെങ്കിലും ഒരു ഒത്തുതീര്‍പ്പിനും തയ്യാറാകാതെ അയാള്‍ കൈയ്യൊഴിഞ്ഞു. തുടര്‍ന്ന് എംബസി മുഖാന്തിരം ഔട്ട്പാസ് സംഘടിപ്പിക്കുകയായിരുന്നു. ദമാം സിറ്റി ഫഌവര്‍ സൂപ്പര്‍ മാര്‍ക്കറ്റ് മേരി ഹെലന് വിമാനടിക്കറ്റും നാട്ടിലേക്ക് കൊണ്ടുപോകാനുള്ള സമ്മാനങ്ങളും സൗജന്യമായി നല്‍കി.