പള്ളിക്കല്‍: അര്‍ഹതപ്പെട്ട പലരെയും ഒഴിവാക്കിയും അര്‍ഹതപ്പെടാത്തവരെ ഉള്‍പ്പെടുത്തിയും വന്ന പുതിയ മുന്‍ഗണനാ പട്ടിക പ്രതിഷേധത്തിനിടയാക്കി. പുതുതായി പ്രസിദ്ധീകരിച്ച മുന്‍ഗണനാ പട്ടികയില്‍ അന്തിമ തിരുമാനമെടുക്കുന്നതിനായി ഇന്നലെ പഞ്ചായത്തിലെ 22 വാര്‍ഡുകളിലും വിളിച്ചുചേര്‍ത്ത ഗ്രാമസഭാ യോഗങ്ങളിലാണ് ഗുണഭോക്താക്കളുടെ ശക്തമായ പ്രതിഷേധം അരങ്ങേറിയത്.
ചില ഗ്രാമസഭകള്‍ ബഹളത്തില്‍ കലാശിച്ചു. നിരവധി തവണ പരിശോധന നടത്തിയ ശേഷം ഇപ്പോള്‍ പ്രസിദ്ധീകരിച്ച അന്തിമ പട്ടികയിലും അര്‍ഹരായ നിരവധി പേര്‍ ഉള്‍പ്പെട്ടിട്ടില്ല. എന്നാല്‍ അനര്‍ഹരായവര്‍ പട്ടികയില്‍ കയറിക്കൂടുകയും ചെയ്തിട്ടുണ്ട്. മുന്‍ഗണനാ, മുന്‍ഗണേതര പട്ടികയുമായി ബന്ധപ്പെട്ട് പരിശോധന നടത്താന്‍ നിയോഗിച്ചിരുന്ന ഉദ്യോഗസ്ഥരുടെ അനാസ്ഥയാണ് ലിസ്റ്റില്‍ വന്‍ ക്രമക്കേടുണ്ടാകാന്‍ കാരണമായതെന്നാണ് നാട്ടുകാര്‍ ആരോപിക്കുന്നത്. പട്ടകിയില്‍ ഉള്‍പ്പെടുത്തണമെങ്കില്‍ അര്‍ഹരായവര്‍ തന്നെ അനര്‍ഹരെ കണ്ടെത്തി അവരെ ലിസ്റ്റില്‍ നിന്നും ഒഴിവാക്കുന്നതിനായി ബന്ധപ്പെട്ട അധികൃതരെ രേഖാമൂലം അറിയിച്ച് അപേക്ഷ നല്‍കണമെന്നാണ് ഗ്രാമ സഭയില്‍ നിന്നും ബന്ധപ്പെട്ടവര്‍ അറിയിച്ചത്.
എന്നാല്‍ അനര്‍ഹരെ കണ്ടെത്തി പട്ടികയില്‍ നിന്നു ഒഴിവാക്കേണ്ടത് ഉദ്യോഗസ്ഥരുടെ ജോലിയാണെന്നിരിക്കെ ഗുണഭോക്താക്കളുടെ മേല്‍ അടിച്ചേല്‍പ്പിക്കാനുള്ള തീരുമാനം അംഗീകരിക്കാന്‍ കഴിയില്ലെന്നും ഇത് നാട്ടില്‍ പരസ്പരം വ്യക്തി വൈരാഗ്യത്തിനും പ്രശ്‌നങ്ങള്‍ക്കും കാരണമാകുമെന്നുമാണ് നാട്ടുകാര്‍ പറയുന്നത്.