പാരിസ്: ഫ്രഞ്ച് ലീഗില്‍ കഴിഞ്ഞ ദിവസം ഗോള്‍മഴയായിരുന്നു. ഫ്രഞ്ച് കരുത്തരായ പി.എസ്.ജിയാണ് ഗോള്‍മഴയില്‍ ഗ്വിന്‍ഗാംപിനെ തകര്‍ത്ത് തരിപ്പണമാക്കിയത്.
ഫ്രഞ്ച് ലീഗ് ചരിത്രത്തില്‍ പി.എസ്.ജിയുടെ എക്കാലത്തെയും മികച്ച ഗോള്‍ മാര്‍ജിന്‍ വിജയവുമായിരുന്നു കഴിഞ്ഞ ദിവസം ടീം സ്വന്തമാക്കിയത്. എതിരില്ലാത്ത ഒന്‍പത് ഗോളുകള്‍ക്കായിരുന്നു പി.എസ്.ജിയുടെ വിജയം. നെയ്മര്‍, എംബാപ്പെ, കവാനി സൂപ്പര്‍ ത്രയങ്ങളാണ് പി.എസ്.ജിക്ക് വമ്പന്‍ വിജയം നേടിക്കൊടുത്തത്.
കിലിയന്‍ എംബാപ്പെയും എഡിന്‍സന്‍ കവാനിയും ഹാട്രിക്കുമായി കസറിയപ്പോള്‍ ഇരട്ട ഗോളുമായി ബ്രസീലിയന്‍ സൂപ്പര്‍ താരം നെയ്മറും പി.എസ്.ജി ഗോള്‍വേട്ടയില്‍ മികച്ചുനിന്നു.

37, 45, 80 മിനുട്ടുകളിലായിരുന്നു എംബാപ്പെയുടെ ഗോള്‍ നേട്ടം. 59, 66, 75 മിനുട്ടുകളിലാണ് കവാനി ഹാട്രിക്ക് പൂര്‍ത്തിയാക്കിയത്.
കഴിഞ്ഞ വര്‍ഷം ഡിജോണിനെതിരേ 8-0ന് നേടിയ വിജയമായിരുന്നു ഫ്രഞ്ച് ലീഗില്‍ ഇതിനു മുമ്പ് പി.എസ്.ജിയുടെ മികച്ച വിജയം. വിജയത്തോടെ ലീഗിലെ രണ്ടണ്ടാം സ്ഥാനക്കാരായ ലില്ലെയുമായുള്ള പോയിന്റ് അകലം പി.എസ്.ജി 13 ആക്കി ഉയര്‍ത്തി.