ന്യൂഡല്‍ഹി: 1951നു മുന്‍പ് അസമിലുള്ളവര്‍ക്കു മാത്രം പൗരനെന്ന നിലയിലുള്ള അവകാശങ്ങള്‍ നല്‍കണമെന്ന ആഭ്യന്തരമന്ത്രാലയം ഉന്നതാധികാര സമിതിയുടെ വിവാദ ശുപാര്‍ശയ്‌ക്കെതിരേ പ്രതിഷേധം ശക്തമായതോടെ ശുപാര്‍ശകള്‍ അംഗീകരിക്കേണ്ടതില്ലെന്ന ആലോചനയില്‍ കേന്ദ്ര സര്‍ക്കാര്‍.
എന്നാല്‍ അസമിലും ഇന്നര്‍ ലൈന്‍ പെര്‍മിറ്റ് നടപ്പാക്കണമെന്ന ശുപാര്‍ശ അംഗീകരിച്ചേക്കും. 1985ലെ അസംകരാറിന്റെ അടിസ്ഥാനത്തില്‍ 1971 മാര്‍ച്ച് 24 ആണ് പൗരത്വപ്പട്ടികയുടെ അടിസ്ഥാന തിയതിയായി നിശ്ചയിച്ചത്.
ഇതിന്റെ അടിസ്ഥാനത്തിലാണ് അസം പൗരത്വപ്പട്ടിക തയാറാക്കിയതും. എന്നാല്‍ 1951ന് മുമ്പ് അസമിലുള്ളവര്‍ക്ക് മാത്രം പൗരനെന്ന നിലയിലുള്ള അവകാശങ്ങള്‍ നല്‍കിയാല്‍ മതിയെന്നാണ് സമിതി ശുപാര്‍ശ ചെയ്തിരിക്കുന്നത്.
ഇതു നടപ്പാക്കിയാല്‍ പൗരത്വ പട്ടികയില്‍ ഉള്‍പ്പെട്ടവര്‍ക്കു പോലും പൗരനെന്ന നിലയിലുള്ള അവകാശങ്ങള്‍ ഇല്ലാതാവും. അസമിലെ മുസ്‌ലിം രാഷ്ട്രീയ പാര്‍ട്ടിയായ എ.ഐ.യു.ഡി.എഫും ബംഗാളി സംസാരിക്കുന്ന വിഭാഗങ്ങളുടെ സംഘടനകളും ഇതിനെ ശക്തമായി എതിര്‍ത്തിട്ടുണ്ട്.
പൗരത്വ പട്ടികയില്‍ ഉള്‍പ്പെട്ട ബംഗാളി സംസാരിക്കുന്ന മുസ്‌ലിംകളുടെ പൗരത്വം കൂടി ഒഴിവാക്കാനുള്ള നീക്കത്തിന്റെ ഭാഗമാണ് ഇതെന്നാണ് എ.ഐ.യു.ഡി.എഫ് നേതാവ് അമീനുന്‍ ഇസ്‌ലാം ചൂണ്ടിക്കാട്ടുന്നത്.
മുസ്‌ലിംകളല്ലാത്തവര്‍ക്ക് പൗരത്വ നിയമഭേദഗതി പ്രകാരം പൗരത്വം നേടാനാവും. നിലവില്‍ അസമിലെ മുസ്‌ലിംകളെ രണ്ടായി തിരിക്കുന്ന സര്‍വേ നടത്താനുള്ള നടപടികള്‍ സംസ്ഥാന സര്‍ക്കാര്‍ ആരംഭിച്ചിട്ടുണ്ട്.
അസം പൗരത്വ പട്ടികയുടെ മാതൃകയില്‍ അസമീസ് ഭാഷ സംസാരിക്കുന്ന മുസ്‌ലിംകളെയും ബംഗാളി സംസാരിക്കുന്ന മുസ്‌ലിംകളെയും രണ്ടായി തിരിക്കുന്ന സര്‍വേയാണ് നടത്തുന്നത്.