കൊണ്ടോട്ടി: നഗരസഭയില്‍ നികുതി വര്‍ധിപ്പിക്കാന്‍ കൗണ്‍സില്‍ തീരുമാം. പുതിയ നികുതി വര്‍ധന നടപ്പാക്കാന്‍ സര്‍ക്കാര്‍ നേരത്തെ തീരുമാനിച്ചിരുന്നെങ്കിലും നഗരസഭയില്‍ ഇതുവരെ നടപ്പാക്കിയിരുന്നില്ല. സ്വകാര്യ കെട്ടിടങ്ങള്‍, ആശുപത്രികള്‍, പാരാമെഡിക്കല്‍ സ്ഥാപനങ്ങള്‍,വീടുകള്‍ തുടങ്ങിയവക്കാണ് നികുതി വര്‍ധിപ്പിക്കുന്നത്. നികുതി പരിഷ്‌കരണം നടപ്പാക്കാത്ത നഗരസഭകള്‍ക്കെതിരെ നടപടികള്‍ ശക്തമാക്കുമെന്ന് സര്‍ക്കാര്‍ പ്രഖ്യാപിച്ചതോടെയാണ് നികുതി വര്‍ധിപ്പിക്കാന്‍ നഗരസഭാ കൗണ്‍സില്‍ തീരുമാനിച്ചത്.
വീടുകള്‍ക്കും കെട്ടിടങ്ങള്‍ക്കും ഒന്നുമുതല്‍ പത്ത് ശതമാനം വരെയാണ് നികുതി വര്‍ധിപ്പിക്കുക. നഗരസഭാ സേവനങ്ങള്‍ ലഭ്യമാകുന്ന ഇടങ്ങളില്‍ നികുതി കൂടും. ശുചിത്വപരിപാലനം, കുടിവെള്ളം ലഭ്യത, തെരുവുവിളക്കുകള്‍, അഴുക്കുചാല്‍ തുടങ്ങിയവ കൊണ്ടോട്ടി നഗരസഭ നടപ്പാക്കിയിട്ടുണ്ട്.ഇത്തരം ഇടങ്ങളില്‍ 10 ശതമാനം വരെ നികുതി നടപ്പാക്കാമെന്നാണ് സര്‍ക്കാര്‍ ചട്ടം.
സ്വകാര്യ ആശുപത്രികളുടെ രജിസ്‌ട്രേഷന്‍ ഫീ 300 രൂപയില്‍ നിന്ന് 2500 രൂപയായി വര്‍ധിപ്പിക്കും.
ഇവരുടെ ലൈസന്‍സ് പുതുക്കുന്നതിന് ആയിരം രൂപയുമായിരിക്കും.പാരാമെഡിക്കല്‍ സ്ഥാപനങ്ങള്‍ക്ക് രജിസ്‌ട്രേഷന്‍ ഫീസ് ആയിരം രൂപയും രജിസ്‌ട്രേഷന്‍ പുതുക്കുന്നതിന് 500 രൂപയുമാക്കി.കൗണ്‍സില്‍ യോഗത്തില്‍ നഗരസഭാ ചെയര്‍പേഴ്‌സണ്‍ കെ.സി ഷീബ അധ്യക്ഷയായി. സ്ഥിരംസമിതി അധ്യക്ഷരായ യു.കെ മമ്മദിശ, പി.എ അഹമ്മദ് കബീര്‍, മുഹമ്മദ് ഷാ മാസ്റ്റര്‍,സൗദാമിനി, അഡ്വ.കെ.കെ.സമദ്, സി.കെ നാടികുട്ടി സംസാരിച്ചു.