കാസര്‍കോട്:  കാസര്‍കോട്, നീലശ്വരം നഗരസഭ ഓഫിസുകളില്‍ വിജിലന്‍സ് പരിശോധന. സംസ്ഥാന വ്യാപകമായി നഗരസഭ ഓഫിസുകളില്‍ നടക്കുന്ന പരിശോധനയുടെ ഭാഗമായാണു കാസര്‍കോട് നഗരസഭാ ഓഫിസിലും നീലേശ്വരം നഗരസഭാ ഓഫിസിലും പരിശോധന നടത്തിയത്. കാസര്‍കോട് നഗരസഭ ഓഫിസ് പ്രവര്‍ത്തനം തുടങ്ങിയ ഉടനെ ആരംഭിച്ച വിജിലന്‍സ് പരിശോധന ഉച്ചയ്ക്ക് രണ്ടു വരെ നീണ്ടു.
വിജിലന്‍സ് ഡിവൈ.എസ്.പി പി. രഘുരാമന്റെ നേതൃത്വത്തിലാണു കാസര്‍കോട് നഗരസഭാ ഓഫിസില്‍ പരിശോധന നടന്നത്. ഈ മാസത്തില്‍ പൂര്‍ത്തിയാക്കേണ്ട പദ്ധതികളുടെ രേഖകളും മുന്‍ കാലങ്ങളില്‍ പൂര്‍ത്തിയാക്കിയ പദ്ധതികളുടെ രേഖകളും വിജിലന്‍സ് സംഘം പരിശോധിച്ചു. ഏതാനും ഫയലുകള്‍ വിജിലന്‍സ് സംഘം കസ്റ്റഡിയിലെടുത്തിട്ടുണ്ട്. കഴിഞ്ഞ ഏതാനും മാസങ്ങളായി നഗരസഭയുമായി ബന്ധപ്പെട്ട് കൗണ്‍സിലര്‍മാര്‍ തന്നെ ഉന്നയിക്കുന്ന അഴിമതി ആരോപണങ്ങള്‍ സംബന്ധിച്ച ഫയലുകളും വിജിലന്‍സ് സംഘം പരിശോധിച്ചു കുറിപ്പ് തയാറാക്കിയിട്ടുണ്ട്. ഇപ്പോള്‍ നടന്നതു പ്രാരംഭ ഫയല്‍ പരിശോധന മാത്രമാണെന്നും വരും ദിവസങ്ങളില്‍ വിശദമായ പരിശോധന ഉണ്ടാവുമെന്നും വിജിലന്‍സുമായി ബന്ധപ്പെട്ടവര്‍ പറഞ്ഞു.
നീലേശ്വരം: നീലേശ്വരം നഗരസഭയില്‍ രാവിലെ 10.30നു തുടങ്ങിയ പരിശോധന വൈകിട്ടു 4. 30വരെ നീണ്ടു. പദ്ധതി നിര്‍വഹണം, ബില്‍ഡിങ് പെര്‍മിറ്റ്, റോഡ് അറ്റകുറ്റപ്പണികള്‍ എന്നിവയിലെ ക്രമക്കേടുകള്‍ പരിശോധിക്കാനായിരുന്നു നിര്‍ദേശം. കാര്യമായ ക്രമക്കേടുകള്‍ കണ്ടെത്തിയില്ലെന്നു വിജിലന്‍സ് സംഘം പറഞ്ഞു. സി.ഐ എ അനില്‍കുമാറിന്റെ നേതൃത്വത്തില്‍ സീനിയര്‍ സിവില്‍ പൊലിസ് ഓഫിസര്‍മാരായ രമേശന്‍, പ്രമോദ്, മനോജ്, ഹിതേഷ്, കൃഷി അസി.ഡയറക്ടര്‍ നമ്പീശന്‍ വിജയേശ്വരി എന്നിവരാണു  സംഘത്തിലുണ്ടായിരുന്നത്.