മനാമ: മണിക്കൂറുകള്‍ക്ക് മുന്പ് മൂന്ന് പേർക്ക് കൂടി കൊറോണ വൈറസ് ബാധ (കോവിഡ്-19) സ്ഥിരീകരിച്ചതോടെ ബഹ്റൈനിലെ വൈറസ് ബാധിതരുടെ എണ്ണം 41 ആയി ഉയര്‍ന്നു.പുതിയ വൈറസ് ബാധിതരെല്ലാം ഇറാനില്‍ നിന്നെത്തിയ സ്വദേശികളാണ്. ഈ സാഹചര്യത്തില്‍ ബഹ്റൈനിലെക്കുള്ളവൈറസ് ബാധയുടെ വ്യാപനം തടയാനുള്ള നടപടികൾ ആരോഗ്യ മന്ത്രാലയം ശക്തമാക്കിയിട്ടുണ്ട്.

ബഹ്റൈന്‍ എയര്‍പോര്‍ട്ടിലെത്തുന്ന മുഴുവന്‍ യാത്രക്കാരുടെയും ശരീരോഷ്മാവ് ചെക്ക് ചെയ്യാനുള്ള പ്രത്യേക സ്കാനിംഗ് കാമറ സംവിധാനം ഇതിന്‍റെ ഭാഗമാണ്. ഇതുവഴി എയര്‍പോര്‍ട്ടിലെത്തുന്ന ഓരോരുത്തരെയും വ്യക്തമായി പരിശോധിക്കുകയും സംശയമുള്ളവരെ വിദഗ്ദരുടെ നേതൃത്വത്തിലുള്ള സംഘം നിരീക്ഷിക്കുകയുമാണ് ചെയ്യുന്നത്.

പരിശോധനക്കിടെ വൈറസ് ബാധ കണ്ടെത്തിയ മുഴുവൻ പേരെയും സുരക്ഷിത കേന്ദ്രങ്ങളിലേക്ക് മാറ്റുകയും വിദഗ്ദചികിൽസ നൽകുകയും ചെയ്തു വരുന്നതായി ആരോഗ്യ മന്ത്രാലയം അറിയിച്ചു.
നിലവില്‍ ചികിത്സയിലുള്ള എല്ലാവരുടെയും ആരോഗ്യനില തൃപ്തികരമാണെന്നും ആശങ്ക വേണ്ട ജാഗ്രതയാണ് ആവശ്യമെന്നും സൽമാനിയ മെഡിക്കൽ കോംപ്ലക്സ് കൺസൾട്ടൻറ് ഡോ. ജമീല ഇവിടെ വാര്‍ത്താസമ്മേളനത്തില്‍ പൊതുജനങ്ങളോട് അഭ്യര്‍ത്ഥിച്ചിരുന്നു.
 

കൊറോണ രോഗബാധക്കെതിരെയുള്ള പ്രതിരോധത്തിന് പൊതുസമൂഹത്തിൻ്റെ സഹായവും പിന്തുണയും അനിവാര്യമാണെന്ന് ക്രൗൺ പ്രിൻസ് സെൻറർ ഫോർ ട്രെയ്നിങ് ആൻറ് മെഡിക്കൽ റിസർച്ചിൽ പ്രവർത്തിക്കുന്ന ദേശീയ ദൗത്യസംഘത്തിലെ അംഗവും ബി.ഡി.എഫ്ഹോസ്പിറ്റലിലെ സാംക്രമിക രോഗ കൺസൾട്ടൻറുമായ ലഫ്.കേണൽ ഡോ. മനാഫ് അൽഖഹ്താനിയും വാർത്താസമ്മേളനത്തിൽ ആവശ്യപ്പെട്ടിരുന്നു.

ഇപ്പോള്‍ വൈറസ് ബാധിതരെ എയര്‍പോര്‍ട്ടില്‍ വെച്ചു തന്നെ കണ്ടെത്തുന്നതിനാല്‍ പരിഭ്രാന്തരാകേണ്ട സാഹചര്യം രാജ്യത്തില്ലെന്നും കടുത്ത പനി, ചുമ, ശ്വാസ തടസ്സം എന്നിവ നേരിട്ടാൽ 444 എന്ന ടോള്‍ ഫ്രീ നമ്പറിൽ അധികൃതരുമായി ബന്ധപ്പെടാമെന്നും ബന്ധ്പെട്ടവര്‍ അറിയിച്ചിട്ടുണ്ട്.