ഭോപ്പാല്‍: ബെലാറസിനെതിരായ അഞ്ചു മത്സരങ്ങളടങ്ങിയ ഹോക്കി പരമ്പര ഇന്ത്യന്‍ വനിതാ ടീം സ്വന്തമാക്കി. തുടര്‍ച്ചയായ മൂന്നാം മത്സരത്തിലും വിജയിച്ചാണു ഇന്ത്യന്‍ വനിതകള്‍ പരമ്പര ഉറപ്പാക്കിയത്. മൂന്നാം പോരാട്ടത്തില്‍ 3-1നാണു ഇന്ത്യയുടെ വിജയം. ഇന്ത്യന്‍ ക്യാപ്റ്റന്‍ റാണി രാംപാല്‍ ഇരട്ട ഗോളുകളുമായി മുന്നില്‍ നിന്നു നയിച്ചു. 24ാം മിനുട്ടില്‍ പെനാല്‍റ്റി കോര്‍ണറിലൂടെ റിത ബടുര ബെലാറസിനെ മുന്നില്‍ കടത്തിയെങ്കിലും 35, 39 മിനുട്ടുകളിലെ ഫീല്‍ഡ് ഗോളുകളിലൂടെ റാണി രാംപാല്‍ ഇന്ത്യയ്ക്ക് ലീഡ് സമ്മാനിച്ചു. 42ാം മിനുട്ടില്‍ ദീപിക ഇന്ത്യയുടെ വിജയം ഉറപ്പാക്കി മൂന്നാം ഗോളും നേടി. നേരത്തെ ആദ്യ മത്സരത്തില്‍ 5-1നും രണ്ടാം മത്സരത്തില്‍ 2-1നുമാണു ഇന്ത്യ വിജയം സ്വന്തമാക്കിയത്.