വാഷിങ്ടണ്‍: അമേരിക്കയില്‍ ട്രംപ് അനുകൂലികളും വിരുദ്ധരും തമ്മില്‍ പലയിടത്തും ഏറ്റുമുട്ടല്‍. ട്രംപ് വിരുദ്ധരുടെ പ്രതിഷേധത്തെ നേരിടാന്‍ അദ്ദേഹത്തെ അനുകൂലിക്കുന്നവരും രംഗത്തുവന്നതോടെയാണ് കൈയാങ്കളിയില്‍ കലാശിച്ചത്. കാലിഫോര്‍ണിയയിലെ ബര്‍ക്കിലിയില്‍ ഇരുവിഭാഗവും ഏറ്റുമുട്ടിയതിനെ തുടര്‍ന്ന് നിരവധി പേര്‍ക്ക് പരുക്കേറ്റു. പത്തുപേരെ പൊലിസ് അറസ്റ്റ് ചെയ്തതായി സിറ്റി വക്താവും മലയാളിയുമായ മത്തായി ചാക്കോ പറഞ്ഞു.
മാര്‍ട്ടിന്‍ ലൂതര്‍ കിങ്ങ് ജൂനിയര്‍ സിവിക്ക് സെന്ററില്‍ നിന്ന് തുടങ്ങിയ മാര്‍ച്ചിനു നേരെ ബര്‍ക്കിലി യൂനിവേഴ്‌സിറ്റിക്ക് സമീപത്തുവച്ചാണ് ആക്രമണം. കറുത്ത വസ്ത്രവും മുഖം മൂടിയും ധരിച്ചെത്തിയ എതിരാളികള്‍ മുട്ടയും കത്തിച്ച അമേരിക്കന്‍ പതാകകളും റാലിക്കു നേരെ എറിഞ്ഞതോടെയാണ് സംഘര്‍ഷമാരംഭിച്ചത്. പൊലിസിന്റെ സന്ദര്‍ഭോചിതമായ ഇടപെടല്‍ കൂടുതല്‍ അനിഷ്ട സംഭവങ്ങള്‍ ഒഴിവാക്കിയത്. കഴിഞ്ഞ ദിവസവും രാജ്യത്തിന്റെ വിവിധ ഭാഗങ്ങളില്‍ ട്രംപ് അനുകൂലികള്‍ പ്രകടനം നടത്തിയിരുന്നു.