തിരുവനന്തപുരം: കെ.എസ്.ആര്‍.ടി.സി മിന്നല്‍ പണിമുടക്കില്‍ ജീവനക്കാര്‍ക്കെതിരെ ഉടന്‍ നടപടിയില്ലെന്ന് ഗതാഗതമന്ത്രി എ.കെ. ശശീന്ദ്രന്‍. ഭരണ പ്രതിപക്ഷ ഭേദമില്ലാതെ തൊഴിലാളി യൂണിയനുകള്‍ സമ്മര്‍ദ്ദം ശക്തമാക്കിയ സാഹചര്യത്തിലാണ് തീരുമാനം.

കെ.എസ്.ആര്‍.ടി.സി ജീവനക്കാര്‍ തിരുവനന്തപുരത്ത് ബുധനാഴ്ച്ച നടത്തിയ മിന്നല്‍ സമരം തെറ്റെന്ന് കളക്ടര്‍ പ്രാഥമിക റിപ്പോര്‍ട്ട് നല്‍കിയിരുന്നു. ബസുകള്‍ റോഡില്‍ നിരത്തിയിട്ട് ഗതാഗത സ്തംഭനമുണ്ടാക്കിയ ജീവനക്കാര്‍ക്കെതിരെ നടപടി വേണമെന്നും കളക്ടര്‍ ശുപാര്‍ശ ചെയ്തിരുന്നു.ജീവനക്കാര്‍ക്കെതിരെ 'എസ്മ' പ്രയോഗിക്കാനും ശുപാര്‍ശ ഉണ്ടായിരുന്നു ഇതേക്കുറിച്ച് വിലയിരുത്താന്‍ ഗതാഗത മന്ത്രി വിളിച്ച ഉന്നതതലയോഗത്തിനു ശേഷമാണ് നിലപാട് അറിയിച്ചത്.

ബസുകള്‍ വഴിയിലിട്ട് സമരം ചെയ്യരുതായിരുന്നു. മിന്നല്‍ പണിമുടക്ക് സര്‍ക്കാര്‍ നയമല്ലെന്നും ഒരാള്‍ മരിച്ചത് നിര്‍ഭാഗ്യകരമാണെന്നും മന്ത്രി വ്യക്തമാക്കി.

അതേസമയം, ലൈസന്‍സ് സസ്‌പെന്‍ഡ് ചെയ്താല്‍ അനശ്ചിതകാല പണിമുടക്കെന്നായിരുന്നു യൂണിയനുകളുടെ നിലപാട്.