അഗളി: മദ്യവര്‍ജിത മേഖലയായ അട്ടപ്പാടിയില്‍ മദ്യപിച്ച് ലക്കുകെട്ട് വഴിയരികില്‍ കിടക്കുന്നവര്‍ പതിവുകാഴ്ചയാകുന്നു.
ബോധരഹിതരായി കിടക്കുന്നവര്‍ വാഹനം കയറി മരിക്കുന്നതും ആനയുടെ ചവിട്ടേറ്റ് മരിക്കുന്നതും ഇവിടെ വിരളമല്ല. അമിത മദ്യപാനവും നിര്‍ജലീകരണവും കാരണം പെരുവഴിയില്‍ മരിച്ചുവീഴുന്നവരും കുറവല്ല.
അമിത മദ്യപാനത്തെ തുടര്‍ന്ന് ആദിവാസി ഊരുകളില്‍ പുരുഷന്മാരുടെ എണ്ണം കുറഞ്ഞുവരികയും അക്രമവും അശാന്തിയും പടര്‍ന്നുപിടിക്കുകയും ചെയ്ത സാഹചര്യത്തില്‍ തായ്കുല സംഘത്തിന്റെ നേതൃത്വത്തില്‍ ആനക്കട്ടിയില്‍ ഒരുമാസത്തിലധികം നീണ്ട സമരം നടന്നിരുന്നു.
ഇതിനു പിന്നാലെ ആനക്കട്ടിയില്‍ പ്രവര്‍ത്തിച്ചിരുന്ന വിദേശ മദ്യഷോപ്പ് അടയ്ക്കുകയും അതിര്‍ത്തി പ്രദേശത്തുനിന്നു വിട്ട് മാങ്കരയിലേക്ക് വിദേശ മദ്യഷോപ്പ് മാറ്റി പ്രവര്‍ത്തിപ്പിക്കുകയും ചെയ്തിരുന്നു. എന്നിട്ടും പ്രദേശത്തെ അവസ്ഥയ്ക്കു മാറ്റമുണ്ടായിട്ടില്ല. ആനക്കട്ടിയിലെ പരസ്യ മദ്യവില്‍പനയ്ക്ക് വിരാമമായെങ്കിലും രഹസ്യവില്‍പന സജീവമാണ്.
കൂടിയ വില നല്‍കി ആനക്കട്ടിയില്‍നിന്നു നിലവാരം കുറഞ്ഞ മദ്യം അട്ടപ്പാടിക്കാര്‍ യഥേഷ്ടം വാങ്ങാന്‍ തുടങ്ങി. അട്ടപ്പാടിയില്‍ മദ്യവില്‍പന മാത്രമാണ് നിരോധിച്ചിട്ടുള്ളത്.
സംസ്ഥാനത്തിന്റെ മറ്റു ഭാഗങ്ങളിലുള്ളതുപോലെ തന്നെ നിയമപരമായി മദ്യം കൈവശം വയ്ക്കുന്നതും മദ്യപിക്കുന്നതും കുറ്റകരമല്ല. എന്നാല്‍ പൊലിസ്-എക്‌സൈസ് വിഭാഗക്കാരുടെ പരിശോധനയില്‍ കുറഞ്ഞ അളവില്‍ മദ്യം പിടിക്കപ്പെട്ടാല്‍ വരെ റോഡില്‍ കമിഴ്ത്തി കളയുന്ന സ്ഥിതിയാണ് പലപ്പോഴും കണ്ടുവരുന്നത്.
ഇക്കാരണത്താല്‍ വാങ്ങുന്ന മദ്യം മുഴുവന്‍ അട്ടപ്പാടിക്കു പുറത്തുനിന്നുതന്നെ അകത്താക്കിയ ശേഷമാണ് പലരും വണ്ടികയറുന്നത്.
ഇവര്‍ ആവശ്യത്തിനു വെള്ളവും കുടിക്കാറില്ല. ഇത്തരത്തില്‍ നിലവാരം കുറഞ്ഞതും അല്ലാത്തതുമായ വിദേശമദ്യം കഴിച്ച് വാഹനത്തില്‍നിന്നു പുറത്തിറങ്ങുന്നവര്‍ റോഡരികില്‍തന്നെ കുഴഞ്ഞു വീഴുകയാണ് പതിവ്.
ഗൂളിക്കടവ് ജംഗ്ഷനില്‍ ഇത്തരത്തില്‍ ബോധമറ്റു വീഴുന്നവരെ സമീപത്തെ വ്യാപാരികളാണ് പലപ്പോഴും അപകടത്തില്‍നിന്നു രക്ഷിക്കുന്നത്.
പൊലിസ് എത്തിയും ഇത്തരക്കാരെ നീക്കാറുണ്ട്. മദ്യപിച്ചുള്ള വഴക്കും ബഹളവും വാഹനമോടിക്കലും പ്രദേശത്ത് പതിവാണ്. മദ്യപിച്ച് കര്‍ഷകനെ അതിദാരുണമായി അടിച്ചുകൊന്ന സംഭവവും അട്ടപ്പാടിയിലുണ്ടായിരുന്നു.