തിരുവനന്തപുരം: ജീവനക്കാര്‍ സമരം ചെയ്തതിനെതിരേയുള്ള പ്രതികാര നടപടിയില്‍ നിന്ന് പിന്മാറി കെഎസ്ആര്‍ടിസി. പണിമുടക്കില്‍ പങ്കെടുത്തവര്‍ക്ക് ശമ്പളം വൈകിപ്പിക്കാനുള്ള ഉത്തരവ് റദ്ദാക്കി. 

വിവാദ ശമ്പള ബില്ലിനെതിരേ പ്രതിഷേധം ശക്തമായിരുന്നു. തുടര്‍ന്നാണ് കെഎസ്ആര്‍ടിസി തീരുമാനത്തില്‍ നിന്ന് പിന്മാറിയത്. ഡയസ്‌നോണ്‍ എന്‍ട്രി വരുന്ന ജീവനക്കാരുടെ ഫ്രെബുവരി മാസത്തെ ശമ്പള ബില്ലുകള്‍ പ്രത്യേകമായി പ്രോസസ് ചെയ്യേണ്ടതില്ലെന്നും ഇവ മറ്റു ബില്ലുകള്‍ക്കൊപ്പം പ്രോസസ് ചെയ്ത് സമയബന്ധിതമായി അപ്രൂവല്‍ നല്‍കണമെന്നും പുതിയ ഉത്തരവില്‍ പറയുന്നു.

ഫെബ്രുവരി നാലിനാണ് വിവിധ ആവശ്യങ്ങളുന്നയിച്ച് കെ.എസ്.ആര്‍.ടി.സി.യില്‍ ട്രാന്‍സ്‌പോര്‍ട്ട് ഡെമോക്രാറ്റിക് ഫെഡറേഷന്റെ (ടി.ഡി.എഫ്.) നേതൃത്വത്തില്‍ ഒരു വിഭാഗം ജീവനക്കാര്‍ പണിമുടക്കിയത്. ശമ്പളവും പെന്‍ഷനും ഒന്നാം തീയതി വിതരണം ചെയ്യുക, ഡി.എ.കുടിശ്ശിക പൂര്‍ണമായും അനുവദിക്കുക, ശമ്പള പരിഷ്‌കരണ കരാറിന്റെ സര്‍ക്കാര്‍ ഉത്തരവ് ഇറക്കുക, ബസ് റൂട്ടുകള്‍ സ്വകാര്യവത്കരിക്കുന്നത് അവസാനിപ്പിക്കുക തുടങ്ങിയ വിവിധ ആവശ്യങ്ങളുന്നയിച്ചായിരുന്നു പണിമുടക്ക്. ഇതിന് പിന്നാലെയാണ് സമരംചെയ്ത ടി.ഡി.എഫ് പ്രവര്‍ത്തകരുടെ ശമ്പളം വൈകിപ്പിക്കാന്‍ കെ.എസ്.ആര്‍.ടി.സി നീക്കം നടത്തിയത്. ഇതോടെ വിഷയത്തില്‍ വലിയ പ്രതിഷേധം ഉയര്‍ന്നു.