നെടുമങ്ങാട്: എക്‌സൈസ് നടത്തിയ റെയിഡില്‍ കാറില്‍ രണ്ട് കിലോ കഞ്ചുവുമായി വരുകയായിരുന്ന യുവാവ് അറസ്റ്റിലായി. തിരുവനന്തപുരം വള്ളക്കടവ് സ്വദേശി അബ്ബാസ് (28) ആണ് അറസ്റ്റിലായത്. കാറും കസ്റ്റഡിയില്‍ എടുത്തിട്ടുണ്ട്.
നെടുമങ്ങാട്, കരകുളം, പേരൂര്‍ക്കട, വള്ളക്കട്, ബീമാപള്ളി പ്രദേശത്തെ കഞ്ചാവിന്റെ മൊത്ത വിതരണക്കാരനും രണ്ട് കൊലക്കേസുകള്‍ ഉള്‍പ്പെടെ അഞ്ചോളം ക്രിമിനല്‍ കേസുകളിലും പ്രതിയാണ് അബ്ബാസെന്നും എക്‌സൈസ് സി.ഐ അറിയിച്ചു.
നെടുമങ്ങാട് താലൂക്കിന്റെ വിവിധ ഭാഗങ്ങളില്‍ യുവാക്കളേയും സ്‌കൂള്‍ കോളജ് വിദ്യാര്‍ഥികളേയും ലക്ഷ്യമിട്ട് ആഡംബര കാറില്‍ കഞ്ചാവ് കടത്തികൊണ്ടു വരവേയാണ് കരകുളം വിദ്യാധിരാജ സ്‌കൂളിന് സമീപം വച്ച് ഇയാള്‍ അറസ്റ്റിലായത്.
ദിവസവും ഓരോതരം ആഡംബര കാറുകള്‍ വാടകയ്‌ക്കെടുത്ത് കറങ്ങി നടന്ന് കഞ്ചാവ് വില്‍പ്പന നടത്താറുള്ള
ഇയാള്‍ ഒരാഴ്ചകാലമായി എക്‌സൈസ് നിരീക്ഷണത്തിലായിരുന്നു. റെയിഡില്‍ ഐ.ആര്‍.രാജേഷ്, സിവില്‍ എക്‌സൈസ് ഓഫിസര്‍മാരായ എസ്.നജിമുദീന്‍, ബി.എസ്.അശോക് കുമാര്‍,
എല്‍. ലിബിന്‍, ആര്‍.എസ്.പ്രശാന്ത്, ആര്‍.സി.ഉല്ലാസ് എന്നിവര്‍ പങ്കെടുത്തു.