കൊച്ചി: ആഫ്രിക്കന്‍-ഏഷ്യന്‍ രാജ്യങ്ങളിലെ മത്സ്യമേഖല മെച്ചപ്പെടുത്തുന്നതിന് രാജ്യങ്ങള്‍ തമ്മില്‍ പരസ്പര സഹകരണം ആവശ്യമാണെന്ന് അന്താരാഷ്ട്ര ഫിഷറീസ് ശില്‍പശാലയില്‍ നിര്‍ദേശം. കേന്ദ്ര സമുദ്രമത്സ്യ ഗവേഷണ സ്ഥാപനത്തില്‍ (സി.എം.എഫ്.ആര്‍.ഐ) നടന്ന ശില്‍പശാലയില്‍ ആഫ്രിക്കന്‍ ഏഷ്യന്‍ റൂറല്‍ ഡവലപ്‌മെന്റ് ഓര്‍ഗനൈസേഷനില്‍ (ആര്‍ഡോ) നിന്നുള്ള പ്രതിനിധികളാണ് സംയുക്ത ഫിഷറീസ് പരിപാലന പദ്ധതികള്‍ വേണമെന്ന് ആവശ്യമുന്നയിച്ചത്.
മത്സ്യമേഖലയുടെ സുസ്ഥിര വികസനത്തിനുള്ള പരിപാലന രീതികളും മറ്റും ആഫ്രോഏഷ്യന്‍ രാജ്യങ്ങള്‍ തമ്മില്‍ പരസ്പര സഹകരണത്തോടെ നടപ്പിലാക്കണമെന്നതാണ് നിര്‍ദേശം. മത്സ്യസമ്പത്തിന്റെ കുറവ്, മലിനീകരണം, അമിതമത്സ്യബന്ധനം, കാലാവസ്ഥാ വ്യതിയാനം തുടങ്ങി മത്സ്യമേഖലയില്‍ നിലനില്‍ക്കുന്ന പ്രതിസന്ധികള്‍ക്ക് പരിഹാരം കാണുന്നതിനും കൂട്ടായ ശ്രമങ്ങളുണ്ടാകണം. ഇതിന് സി.എം.എഫ്.ആര്‍.ഐ പോലുള്ള ഗവേഷണ സ്ഥാപനങ്ങളുടെ സാങ്കേതിക സഹായം ഉപയോഗപ്പെടുത്തി രാജ്യാന്തര തലത്തില്‍ നയരൂപീകരണം നടത്തണമെന്നും ശില്‍പശാലയില്‍ പങ്കെടുത്ത ഒമാന്‍, തായ്‌വാന്‍, സിറിയ, ലബനോന്‍, ടുണീഷ്യ, ലിബിയ, മൊറോക്കോ, മലാവി, മൗറീഷ്യസ്, ബംഗ്ലാദേശ്, ശ്രീലങ്ക, സാംബിയ എന്നീ രാജ്യങ്ങളില്‍ നിന്നുള്ള പ്രതിനിധികള്‍ പറഞ്ഞു.
രണ്ടാഴ്ച നീണ്ടുനിന്ന ശില്‍പശാലയുടെ സമാപന സംഗമത്തില്‍ സി.എം.എഫ്.ആര്‍.ഐ ഡയറക്ടര്‍ ഡോ.എ ഗോപാലകൃഷ്ണന്‍ അധ്യക്ഷത വഹിച്ചു.ഡോ.ഇമല്‍ഡ ജോസഫ്, ഡോ സോമി കുര്യാക്കോസ്, രാജേഷ്.എന്‍ പ്രസംഗിച്ചു. ആര്‍ഡോയുടെ സഹകരണത്തോടെ സി.എം.എഫ്.ആര്‍.ഐയില്‍ നടന്ന ശില്‍പശാലയില്‍ സമുദ്രമത്സ്യ പരിപാലനം, സമുദ്രപരിസ്ഥിതി, കാലാവസ്ഥാവ്യതിയാനം, ഉത്തരവാദിത്വ പൂര്‍ണ മത്സ്യബന്ധനം, സമുദ്രകൃഷി തുടങ്ങിയ വിവിധ വിഷയങ്ങളില്‍ ചര്‍ച്ചകള്‍ നടന്നു.