#അഹമ്മദ് പാതിരിപ്പറ്റ

കോഴിക്കോട്: ജില്ലാ പ്രവാസി അസോസിയേഷന്‍ (കെ.പി.എ.ക്യു) സംഘടിപ്പിച്ച മൂന്നാമത് ഇമാമി ഒളിംപ്യന്‍ റഹ്മാന്‍ മെമ്മോറിയല്‍ അഖിലേന്ത്യാ സെവന്‍സ് ഫുട്‌ബോള്‍ ടൂര്‍ണമെന്റില്‍ എഫ്.സി കൊച്ചിന്‍ ജേതാക്കളായി. ദോഹ സ്റ്റേഡിയത്തില്‍ നടന്ന ഫൈനല്‍ മത്സരത്തില്‍ ഷവര്‍മ കിങ് എഫ്.സിയെ രണ്ടിനെതിരെ അഞ്ചു ഗോളുകള്‍ക്ക് പരാജയപ്പെടുത്തിയാണ് എഫ്.സി കൊച്ചിന്‍ കിരീടം നേടിയത്. നാലുഗോള്‍ സ്‌കോര്‍ ചെയ്തു റോഷന്‍ ടീമിന്റെ വിജയത്തില്‍ നിര്‍ണായക പങ്കു വഹിച്ചു.

ടൂര്‍ണമെന്റിലെ മികച്ച കളിക്കാരനായി ബി.എഫ്.കെ കാസര്‍കോടിന്റെ അല്‍ഫാസും ഗോള്‍കീപ്പറായി ഫ്രൈഡേ എഫ്.സിയുടെ ജാക്ക്‌ലിന്‍ ജേക്കബും തെരഞ്ഞെടുക്കപ്പെട്ടു. ഒന്‍പതു ഗോളുകള്‍ നേടി എഫ്.സി കൊച്ചിന്റെ റോഷന്‍ ടൂര്‍ണമെന്റ് ടോപ്‌സ്‌കോറര്‍ ട്രോഫിക്കര്‍ഹനായി. വിജയികള്‍ക്കുള്ള ട്രോഫി ഐ.സി.സി പ്രസിഡന്റ് എ.പി മണികണ്ഠനും പ്രൈസ് മണി ഇമാമി ഫെയര്‍ ആന്‍ഡ് ഹാന്‍സം കണ്‍ട്രി മാനേജര്‍ ബസന്തും സമ്മാനിച്ചു.

റണ്ണേഴ്‌സിനുള്ള ട്രോഫി അല്‍ അനീസ് മാര്‍ക്കറ്റിംഗ് മാനേജര്‍ ഷാനിബ്, പ്രൈസ് മണി വി സെര്‍വ് മാനേജിങ് ഡയറക്ടര്‍ ജെനി ആന്റണി എന്നിവര്‍ നിര്‍വ്വഹിച്ചു.

കെ.പി.എ.ക്യു ആക്ടിങ് പ്രസിഡന്റ് പി.കെ അബ്ദുല്‍ റഹീം അധ്യക്ഷത വഹിച്ച സമാപനച്ചടങ്ങ് കിയ പ്രസിഡന്റ് ഇ.പി അബ്ദുല്‍ റഹ്മാന്‍ ഉദ്ഘടനം ചെയ്തു. ഇന്ത്യന്‍ സ്‌പോര്‍ട്‌സ് സെന്റര്‍ എം.സി മെമ്പര്‍ സഫീര്‍ , കിഫ് സെക്രട്ടറി ഹൈദര്‍ അലി,അല്‍ അബീര്‍ മെഡിക്കല്‍ സെന്റര്‍ മാര്‍ക്കറ്റിങ് മാനേജര്‍ നീല്‍, വി സെര്‍വ് ഗ്രൂപ്പ് എം.ഡി ജെന്നി ആന്റണി, ഫെസ്റ്റിവല്‍ ലിമോസിന്‍ എം.ഡി ഷാഹിദ് തുടങ്ങിയവര്‍ ആശംസകള്‍ അര്‍പ്പിച്ചു. അല്‍സദ് ക്ലബ്ബിന്റെ അണ്ടര്‍ 12 ടീമില്‍ കളിക്കുന്ന ജെറോണ്‍ ജെന്നി, അല്‍ അഹ്ലി ക്ലബ്ബിന്റെ അണ്ടര്‍ 13 ടീമില്‍ അംഗമായിട്ടുള്ള ഷഹദ് ഷെജി എന്നീ വിദ്യാര്‍ത്ഥികളെ ചടങ്ങില്‍ അനുമോദിച്ചു. കെ.പി.എ.ക്യു സെക്രട്ടറി രവിപുതുക്കുടി സ്വാഗതവും സ്‌പോര്‍ട്‌സ് വിങ്ങ് കണ്‍വീനര്‍ ജെ.എം ഷൗക്കത്ത് നന്ദിയും പറഞ്ഞു.