മുംബൈ: രഞ്ജി ട്രോഫി ക്രിക്കറ്റ് ഫൈനലില്‍ സൗരാഷ്ട്രയെ തകര്‍ത്ത് വിദര്‍ഭ തുടര്‍ച്ചയായ രണ്ടാം കിരീടം സ്വന്തമാക്കി. 78 റണ്‍സിനാണ് വിദര്‍ഭയുടെ ജയം.
രണ്ടാം ഇന്നിങ്‌സില്‍ 206 റണ്‍സെന്ന വിജയലക്ഷ്യം പിന്തുടര്‍ന്ന സൗരാഷ്ട്ര 127 റണ്‍സിന് പുറത്തായി. ആറ് വിക്കറ്റെടുത്ത ആദിത്യ സര്‍വതെയുടെ പ്രകടനമാണ് സൗരാഷ്ട്രയെ രണ്ടാം ഇന്നിങ്‌സില്‍ തകര്‍ത്തത്. രണ്ട് ഇന്നിങ്‌സുകളിലുമായി ആദിത്യ 11 വിക്കറ്റുകള്‍ വീഴ്ത്തി. രണ്ടാം ഇന്നിങ്‌സില്‍ 49 റണ്‍സെടുത്ത് ബാറ്റിങ്ങിലും തിളങ്ങിയ ആദിത്യ കളിയിലെ താരമായി. ആദ്യം ബാറ്റ് ചെയ്ത വിദര്‍ഭ 312 റണ്‍സാണ് സ്‌കോര്‍ ചെയ്തത്. മറുപടി ബാറ്റിങ്ങിനിറങ്ങിയ സൗരാഷ്ട്ര 307 റണ്‍സിന് എല്ലാവരും പുറത്തായി. നേരിയ ലീഡുമായി രണ്ടാം ഇന്നിങ്‌സിനിറങ്ങിയ വിദര്‍ഭ 200 റണ്‍സെടുത്ത് 206 റണ്‍സിന്റെ ചെറിയ വിജയലക്ഷ്യം മുന്നില്‍വച്ചെങ്കിലും ബാറ്റിങ്ങിലെ തിരിച്ചടി സൗരാഷ്ട്രക്ക് വിനയായി. വിജയലക്ഷ്യം പിന്തുടര്‍ന്ന സൗരാഷ്ട്രക്കായി വിശ്വരാജ് ജഡേജ 52 റണ്‍സെടുത്തു. ധര്‍മേന്ദ്ര സിന്‍ഹ് ജഡേജ (17), എസ്.എസ് പട്ടേല്‍ (12), കമലേഷ് മക്‌വാന (14) എന്നിവര്‍ മാത്രമാണ് സൗരാഷ്ട്ര നിരയില്‍ മറ്റു രണ്ടക്കം കടന്നവര്‍. മറ്റു ബാറ്റ്‌സ്മാന്മാര്‍ക്ക് തിളങ്ങാനായില്ല. അന്താരാഷ്ട്ര താരം ചേതേശ്വര്‍ പൂജാര രണ്ട് ഇന്നിങ്‌സിലും പരാജയമായി. ആദ്യ ഇന്നിങ്‌സില്‍ ഒരു റണ്‍സെടുത്ത താരം രണ്ടാം ഇന്നിങ്‌സില്‍ റണ്ണൊന്നുമെടുക്കാതെയാണ് മടങ്ങിയത്. നേരത്തേ രണ്ടാം ഇന്നിങ്‌സില്‍ ഗണേഷ് സതീഷ് (35), മോഹിത് കാലെ (38), ആദിത്യ സര്‍വതെ (49) എന്നിവരുടെ ഇന്നിങ്‌സാണ് വിദര്‍ഭയെ 200ലെത്തിച്ചത്. വസീം ജാഫര്‍ 11 റണ്‍സെടുത്ത് മടങ്ങി. വിദര്‍ഭയുടെ കിരീട നേട്ടത്തില്‍ നിര്‍ണായക പങ്ക് വഹിച്ച വസീം 10 രഞ്ജി ട്രോഫി നേടുന്ന താരമെന്ന റെക്കോര്‍ഡ് സ്വന്തമാക്കി.