ഊട്ടി: ജനവാസ കേന്ദ്രത്തിലെത്തിയ കാട്ടുപോത്തിന്റെ ആക്രമണത്തില്‍ വിദ്യാര്‍ഥിക്ക് പരുക്ക്. കുന്നൂരിലെ ലൂസിയാന എസ്റ്റേറ്റില്‍ താമസിക്കുന്ന സെല്‍വകുമാറിന്റെ മകന്‍ കാര്‍ത്തിക് (16)നാണ് പരുക്കേറ്റത്.കഴിഞ്ഞ ദിവസം വൈകിട്ട് റോഡിലൂടെ നടക്കുമ്പോള്‍ എതിര്‍ഭാഗത്ത് നിന്നെത്തിയ കാട്ടുപോത്ത് കാര്‍ത്തികിനെ ആക്രമിക്കുകയായിരുന്നു.
കുട്ടിയുടെ നിലവിളി കേട്ട് ഓടിക്കൂടിയ സമീപവാസികളാണ് ഗുരുതരമായി പരുക്കേറ്റ കുട്ടിയെ ആശുപത്രിയിലേക്ക് മാറ്റിയത്. ആദ്യം കുന്നൂര്‍ താലൂക്ക് ആശുപത്രിയിലും തുടര്‍ന്ന് കോയമ്പത്തൂര്‍ മെഡിക്കല്‍ കോളജിലും പ്രവേശിപ്പിച്ചു. കുന്നൂരിലെ
പ്രൈസ്റ്റ് സ്‌കൂളില്‍ പ്ലസ്ടു വിദ്യാര്‍ഥിയാണ് കാര്‍ത്തിക്. കുന്നൂരിലും പരിസരങ്ങളില്‍ ദിവസങ്ങളായി വന്യമൃഗശല്യം രൂക്ഷമായിരിക്കുകയാണ്. സമീപത്തെ വനഭാഗത്ത് നിന്നെത്തുന്ന കരടി, കാട്ട്‌പോത്ത്, പുലി എന്നിവയാണ് പ്രദേശത്തുകാരുടെ ഉറക്കം കെടുത്തുന്നത്. വന്യമൃഗശല്യം പരിഹരിക്കാന്‍ അടിയന്തര നടപടിയുണ്ടാകണമെന്നാണ് നാട്ടുകാരുടെ ആവശ്യം.