കല്‍പ്പറ്റ: വാരാമ്പറ്റ സയ്യിദ് അലി അക്ബര്‍ ദില്ലിക്കോയ തങ്ങളുടെ പേരിലുള്ള ഉറൂസ് 23 മുതല്‍ 28 വരെ നടക്കുമെന്ന് സംഘാടക സമിതി ഭാരവാഹികള്‍ വാര്‍ത്താ സമ്മേളനത്തില്‍ അറിയിച്ചു. ഉറൂസിന് തുടക്കം കുറിച്ച് ഇന്നു വൈകിട്ട് നാലിന് സയ്യിദ് ഇമ്പിച്ചിക്കോയ തങ്ങള്‍ കൊടിയുയര്‍ത്തും. 23, 24 തിയതികളില്‍ നടക്കുന്ന മതപ്രഭാഷണ പരിപാടിയില്‍ ഇസ്മായില്‍ ദാരിമി വെള്ളമുണ്ട, അബ്ദുല്ല സലിം വാഫി എന്നിവര്‍ പ്രസംഗിക്കും. 23ന് സമസ്ത കേന്ദ്ര മുശാവറ അംഗം വി. മൂസക്കോയ മുസ്‌ലിയാര്‍ ഉദ്ഘാടനം ചെയ്യും. 24ന് അബ്ദുസ്സലാം അന്‍വരി ഉദ്ഘാടനം ചെയ്യും.
24ന് വൈകിട്ട് നാലിന് ഉലമാ-ഉമറാ സംഗമവും, മദ്‌റസാ മാനേജ് അസോസിയേഷന്‍ സംസ്ഥാന പ്രസിഡന്റായി തെരഞ്ഞെടുക്കപ്പെട്ട കെ.ടി ഹംസ മുസ്‌ലിയാരെ ആദരിക്കലും നടക്കും. പി.എ ആലി ഹാജി ഉദ്ഘാടനം ചെയ്യും. സി.പി ഹാരിസ് ബാഖവി അധ്യക്ഷനാകും. റഫീഖ് സക്കരിയ്യ ഫൈസി കൂടത്തായി മുഖ്യപ്രഭാഷണം നടത്തും. 25ന് രാവിലെ 10ന് നടക്കുന്ന വനിതാ സംഗമം ഉസ്മാന്‍ ദാരിമി പന്തിപ്പൊയില്‍ ഉദ്ഘാടനം ചെയ്യും. ജുബൈര്‍ ദാരിമി അധ്യക്ഷനാകും. ആസിഫ് വാഫി മുഖ്യപ്രഭാഷണം നടത്തും. ഏഴിന് സആദ കോളജ് വിദ്യാര്‍ഥികളുടെ ബുര്‍ദാ ആലാപനം നടക്കും. തുടര്‍ന്ന് ജമാലുദ്ദീന്‍ ഫൈസി പ്രഭാഷണം നടത്തും. 26ന് വൈകിട്ട് ഏഴിന് നടക്കുന്ന ദിക്ര്‍ ദുആ മജ്‌ലിസ് പാണക്കാട് സയ്യിദ് ഹമീദലി ശിഹാബ് തങ്ങള്‍ ഉദ്ഘാടനം ചെയ്യും. ഷൗക്കത്തലി മൗലവി വെള്ളമുണ്ട മുഖ്യപ്രഭാഷണം നടത്തും. മാണിയൂര്‍ അബ്ദുല്ല മൗലവി ദുആക്ക് നേതൃത്വം നല്‍കും.
28ന് രാവിലെ 11ന് നടക്കുന്ന മൗലീദ് പാരായണം, ഖത്തം ദുആ എന്നിവക്ക് പാണക്കാട് സയ്യിദ് ശഹീറലി ശിഹാബ് തങ്ങള്‍ നേതൃത്വം നല്‍കും. ഇബ്രാഹിം ഫൈസി പേരാല്‍ ഉല്‍ബോധനം നടത്തും. എ.കെ ആലി ഹാജി ബപ്പനം അധ്യക്ഷനാകും. വാര്‍ത്താസമ്മേളനത്തില്‍ സംഘാടക സമിതി ചെയര്‍മാന്‍ പി.എ ആലി ഹാജി, കണ്‍വീനര്‍ അബ്ദുല്ല, വര്‍ക്കിങ് ചെയര്‍മാന്‍ എ. മുഹ്‌യദ്ദീന്‍കുട്ടി യമാനി, പബ്ലിസിറ്റി ചെയര്‍മാന്‍ പി.ഒ നാസര്‍, കണ്‍വീനര്‍ പി. നാസര്‍ പങ്കെടുത്തു.