ന്യൂഡല്‍ഹി: മൊബൈല്‍ കണക്ഷന് ആധാര്‍ നിര്‍ബന്ധമല്ലെന്നു ചൂണ്ടിക്കാട്ടി കേന്ദ്രം ഉത്തരവിറക്കി.ആധാറിനു പകരം മറ്റു തിരിച്ചറിയല്‍ രേഖകള്‍ ഹാജരാക്കിയാല്‍ മതിയെന്ന് കേന്ദ്ര ടെലികോം മന്ത്രാലയം കമ്പനികള്‍ക്കയച്ച സര്‍ക്കുലറില്‍ പറയുന്നു.പാസ്‌പോര്‍ട്ട് , ഡ്രൈവിംഗ് ലൈസന്‍സ്, വോട്ടര്‍ ഐഡി എന്നിവയുള്‍പ്പെടെയുള്ള തിരിച്ചറിയല്‍ രേഖകള്‍ മൊബൈല്‍ കണക്ഷന്‍ നേടുന്നതിനായി ഉപയോഗിക്കാം.ഉത്തരവ് എത്രയും വേഗത്തില്‍ നടപ്പാക്കാന്‍ ടെലികോം സെക്രട്ടറി അരുണ സുന്ദരരാജന്‍ കമ്പനികള്‍ക്കു നിര്‍ദ്ദേശം നല്‍കി.കഴിഞ്ഞ വര്‍ഷമാണ് മൊബൈല്‍ കണക്ഷനു ആധാര്‍ നിര്‍ബന്ധമാക്കി ടെലികോം മന്ത്രാലയം ഉത്തരവിറക്കിയത്.
ആധാര്‍ കാര്‍ഡില്ലാത്ത കാരണം പറഞ്ഞു രാജ്യത്തിന്റെ പല ഭാഗങ്ങളിലും ജനങ്ങള്‍ക്ക് മൊബൈല്‍ സിം നിഷേധിക്കുന്നതായി റിപ്പോര്‍ട്ടുകളുണ്ടായിരുന്നു. ആധാര്‍ സംബന്ധിച്ച് അന്തിമ തീരുമാനമുണ്ടാകുന്നതുവരെ ആധാറില്ലാതെയും സിം കാര്‍ഡ് വിതരണം ചെയ്യാമെന്ന് സുപ്രീം കോടതി അറിയിച്ചിരുന്നതാണ്. മറ്റു കെവൈസി (നോ യുവര്‍ കസ്റ്റമര്‍) രേഖകള്‍ സ്വീകരിച്ച് സിം കാര്‍ഡ് നല്‍കുന്നതു തുടരാനാണ് ടെലികോം കമ്പനികളെ അറിയിച്ചിരിക്കുന്നതെന്നും അരുണ സുന്ദരരാജന്‍ വ്യക്തമാക്കി.നേരത്തെ ടെലികോം മന്ത്രാലയത്തില്‍ നിന്നു ലഭിച്ച നിര്‍ദേശപ്രകാരം ആധാര്‍ രേഖകള്‍ ഉപയോഗിച്ചാണ് മൊബൈല്‍ കമ്പനികള്‍ പരിശോധനകള്‍ പൂര്‍ത്തിയാക്കിയിരുന്നത്. വിദേശത്തു താമസിക്കുന്ന ഇന്ത്യക്കാരെയും രാജ്യം സന്ദര്‍ശിക്കുന്ന വിദേശികളെയുമാണ് ഇത് കൂടുതല്‍ ബാധിച്ചത്. ആധാര്‍ കാര്‍ഡില്ലാത്തതിനാല്‍ പലര്‍ക്കും സിം കാര്‍ഡ് നിഷേധിക്കുന്നത് പതിവായിരുന്നു.സിം കാര്‍ഡ് ആധാറുമായി ബന്ധിപ്പിക്കണമെന്ന് എസ്എംഎസ്, ഫോണ്‍ കോള്‍ എന്നിവയിലൂടെ കമ്പനികള്‍ ഉപഭോക്താക്കളെ കമ്പനികള്‍ അറിയിച്ചിരുന്നു.