മാനന്തവാടി: വെണ്‍മണി സ്വദേശിയെ അജ്ഞാത സംഘം കെട്ടിയിട്ടു മര്‍ദ്ദിച്ചതായി പരാതി. മലങ്കര കത്തോലിക്ക പള്ളിക്കു സമീപം താമസിക്കുന്ന തറയില്‍ ഷാജനെ (46) തോക്കു ചൂണ്ടി ഭീഷണിപ്പെടുത്തി കയറു കൊണ്ട് കൈയ്യും കാലും കെട്ടിയിട്ടു മര്‍ദ്ദിച്ചെന്നാണ് പരാതി.
ചൊവ്വാഴ്ച രാത്രി 7.30 ഓടെ തവിഞ്ഞാല്‍ 43 വെണ്‍മണി റോഡിലായിരുന്നു സംഭവം. റോഡു പണി നടക്കുന്നതിനാല്‍ വാഹനങ്ങള്‍ പോവാത്തതിനാല്‍ വിജനമായിരുന്നു റോഡ്. ഭക്ഷണസാധനം ചോദിച്ചെത്തിയ രണ്ടു പേര്‍ തോക്കു ചൂണ്ടി ഭീഷണിപ്പെടുത്തിയെന്നാണ് പരാതി.
സംഘത്തില്‍ ഏഴോളം പേരുണ്ടായിരുന്നുവെന്നാണ് വിവരം. ഭക്ഷണങ്ങസാധനങ്ങളൊന്നും ഇല്ലെന്നറിയിച്ച ഷാജന്‍ പേടി മൂലം ഓടി രക്ഷപ്പെടാന്‍ ശ്രമിക്കുന്നതിനിടയിലാണ് കെട്ടിയിട്ട് മര്‍ദ്ദിച്ചത്. റോഡരികില്‍ കയര്‍ കൊണ്ട് കെട്ടിയിട്ട നിലയില്‍ കണ്ട ഷാജനെ സമീപവാസികളാണ് മോചിപ്പിച്ചത്.
സംഭവമറിഞ്ഞ് മാനന്തവാടി ഡിവൈ.എസ്.പി യുടെ നേതൃത്വത്തില്‍ വന്‍ പൊലിസ് സന്നാഹം സ്ഥലത്തെത്തി പരിശോധന നടത്തി. സംഭവത്തിനു പിന്നില്‍ മാവോവാദികളാണോ എന്ന അന്വേഷണത്തിലാണ് പൊലിസ്.
മാവോവാദികളുടെ പേരില്‍ ആരെങ്കിലും മുതലെടുപ്പ് നടത്തുന്നതാണോ എന്ന കാര്യവും അന്വേഷിക്കും. കഴിഞ്ഞ ദിവസം മാവോവാദി സംഘം എത്തിയ തവിഞ്ഞാല്‍ പഞ്ചായത്തില്‍ തന്നെയാണ് വെണ്‍മണി പ്രദേശവും.