കോഴിക്കോട്: മാര്‍ച്ചും ഏപ്രിലും തകര്‍ത്തു പെയ്തതോടെ സംസ്ഥാനത്ത് വേനല്‍മഴയുടെ ലഭ്യതയില്‍ ശരാശരിയേക്കാള്‍ 18 ശതമാനം വര്‍ധനവ്.
മാര്‍ച്ച് മുതല്‍ ഈ മാസം രണ്ടുവരെയുള്ള സംസ്ഥാന കാലാവസ്ഥാ കേന്ദ്രത്തിന്റെ കണക്കനുസരിച്ച് കേരളത്തില്‍ 18ഉം ലക്ഷദ്വീപില്‍ 206ഉം ശതമാനം അധിക മഴ ലഭിച്ചു. സംസ്ഥാനത്ത് ഈ കാലയളവില്‍ ലഭിക്കേണ്ട 151.3 എം.എം മഴയ്ക്ക് പകരം 179 എം.എം മഴലഭിച്ചു. 66.2 എം.എം മഴ ലഭിക്കേണ്ട ലക്ഷ ദ്വീപില്‍ 202.5 എം.എം മഴയാണ് ലഭിച്ചത്.
കഴിഞ്ഞ വര്‍ഷം ഏറ്റവും കുറവ് കാലവര്‍ഷം ലഭിച്ച വയനാട്ടിലാണ് ഇത്തവണ ഏറ്റവും കൂടുതല്‍ വേനല്‍മഴ പെയ്തത്. 80 ശതമാനം അധികമഴയാണ് വയനാട്ടില്‍ ലഭിച്ചത്. കാസര്‍കോട് 79 , കോഴിക്കോട് 73, കണ്ണൂര്‍ 60 ശതമാനം എന്നിങ്ങനെ അധിക മഴ ലഭിച്ചു. ഈ ജില്ലകളെല്ലാം മഴ വളരെ കൂടുതല്‍ ലഭിച്ച ഗണത്തിലാണ്. മഴ കൂടുതല്‍ ലഭിച്ച ജില്ലകളുടെ പട്ടികയില്‍ മുന്നില്‍ എറണാകുളമാണ്. 58 ശതമാനം.
കോട്ടയം (47), മലപ്പുറം (50) എന്നിവയാണ് മറ്റുജില്ലകള്‍.
സാധാരണ മഴലഭിച്ച ജില്ലകളില്‍ മുന്നില്‍ 19 ശതമാനം അധിക മഴലഭിച്ച പത്തനംതിട്ടയാണ്. പാലക്കാട് (10), കൊല്ലം (2), 7 ശതമാനം മഴ കുറവ് ലഭിച്ച ഇടുക്കി എന്നിവയും ഈ പട്ടികയില്‍ ഉള്‍പ്പെടും.
ഏറ്റവും കുറവ് മഴലഭിച്ചത് തിരുവനന്തപുരത്താണ്.
40 ശതമാനം. 36 ശതമാനം മഴക്കുറവ് ലഭിച്ച തൃശൂരും 25 ശതമാനം മഴക്കുറവ് ലഭിച്ച ആലപ്പുഴയും മഴകുറവുള്ള ജില്ലകളാണ്.