മണ്ണാര്‍ക്കാട്: വല്യുപ്പയുടെ ഒസ്യത്ത് യാഥാര്‍ഥ്യമാക്കിപേരമക്കള്‍. വെള്ളപ്പാടത്ത് മൊയ്ദീന്‍ കുട്ടി ഹാജിയുടെ ഒസ്യത്തായിരുന്നു വെള്ളപ്പാടത്ത് ഹയാത്തുല്‍ ഇസ്‌ലാം മദ്‌റസക്ക് മികച്ച സൗകര്യങ്ങളുള്ള കെട്ടിടം നിര്‍മ്മിച്ചു നല്‍കണമെന്നത്.
മൊയ്തീന്‍കുട്ടി ഹാജിയുടെ മക്കളായ ഹംസ, കുഞ്ഞയമു എന്നിവര്‍ ഹാജി ജീവിച്ചിരിക്കേ തന്നെ മരണപ്പെട്ടിരുന്നു. ഹാജിയുടെ മരണാനന്തരം ഹംസയുടേയും കുഞ്ഞയമുവിന്റേയും മക്കള്‍ ചേര്‍ന്നാണ് ഹാജിയുടെ സ്വപ്നം യാഥാര്‍ഥ്യമാക്കിയത്.
ഹാജിയുടെ ഒസ്യത്ത് പ്രകാരം അദ്ദേഹത്തിന്റെ പേരിലുണ്ടായിരുന്ന സ്ഥലം വിറ്റതുക കൊണ്ടാണ് മികച്ച സൗകര്യങ്ങളോടെ മദ്‌സ നിര്‍മ്മിച്ചു നല്‍കിയത്. കഴിഞ്ഞ ദിവസം പാണക്കാട് സയ്യിദ് അബ്ബാസലി ശിഹാബ് തങ്ങള്‍ ഉദ്ഘാടനം ചെയ്തു.കുടുംബ ഭദ്രതക്ക് വലിയ പ്രാധാന്യം കല്‍പ്പിച്ച് കുടുംബത്തിനും കാരാപ്പാടം മഹല്ലിനും വേണ്ടി ഒഴിഞ്ഞ് വച്ച ഒരു പുരുഷ്യായുസായിരുന്നു ഹാജിയുടേതെന്ന് ചടങ്ങിനെത്തിയവര്‍ സ്മരിച്ചു.
ഇന്ന് കാണുന്ന കാരാപ്പാടം മഹല്ലിന്റെ വളര്‍ച്ചയിലും വികസന പ്രവര്‍ത്തനങ്ങളിലും മുഖ്യപങ്കു വഹിച്ച വ്യക്തികളില്‍ ഒരാളായിരുന്നു ഹാജി.
മൊയ്ദീന്‍കുട്ടി ഹാജിയുടെ പേരമക്കളായ അബ്ദുല്‍ അസീസ്, സൈഫുദ്ധീന്‍, ജാഫര്‍, മുഹമ്മദ് ഫാസില്‍, തുടങ്ങിയവരാണ് ആധുനിക മദ്‌റസാകെട്ടിടം യാഥാര്‍ഥ്യമാക്കുന്നതിന് നേതൃത്വം നല്‍കിയത്. പതിനേഴര ലക്ഷം രൂപയാണ് നിര്‍മ്മാണത്തിന് ചെലവായത്.