കുറ്റ്യാടി: പൂര്‍വ സൂരികളായ പണ്ഡിതന്മാരാല്‍ സ്ഥാപിതമായ സമസ്ത കേരള ജംഇയ്യത്തുല്‍ ഉലമയുടെ ലക്ഷ്യം വിശുദ്ധ ദീനിന്റെ സംരക്ഷണമാണെന്ന് സമസ്ത പ്രസിഡന്റ് സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍.
എസ്.കെ.എസ്.എസ്.എഫ് ജില്ലാ പൈതൃക മുന്നേറ്റ യാത്രയുടെ ഉദ്ഘാടനം കുറ്റ്യാടി ശംസുല്‍ ഉലമാ നഗറില്‍ നിര്‍വഹിച്ചു സംസാരിക്കുകയായിരുന്നു അദ്ദേഹം.
പരമ്പരാഗതമായി കൈമാറിപ്പോന്ന ഇസ്‌ലാം മനുഷ്യസ്‌നേഹവും മാനവിക മൂല്യങ്ങളുമാണ് ഉയര്‍ത്തിപ്പിടിക്കുന്നത്. വിശ്വാസികളുടെ ഈമാന്‍ സംരക്ഷിക്കുക എന്ന ദൗത്യമാണ് സമസ്ത നിര്‍വഹിച്ചു പോരുന്നത്. വിശ്വാസ വൈകല്യത്തിന് കാരണക്കാരായ പുത്തന്‍വാദികളെയും അന്ധവിശ്വാസങ്ങളെയും സമൂഹത്തെ നയിക്കുന്ന ആള്‍ദൈവങ്ങളെയും സമസ്ത പ്രതിരോധിച്ചിട്ടുണ്ട്.
ആത്മീയതയെ ചൂഷണോപാധിയാക്കി മാറ്റിയ വ്യാജ ത്വരീഖത്തുക്കള്‍ക്കെതിരേ ആര്‍ജവത്തോടെ പ്രതികരിച്ച പാരമ്പര്യമാണ് സമസ്തയുടേത്. എന്നാല്‍ ഇതിനിടയിലും ഐക്യപ്പെടേണ്ട മേഖലകളില്‍ ആദര്‍ശത്തില്‍ വിട്ടുവീഴ്ച്ച ചെയ്യാതെ തന്നെ ഐക്യത്തിന്റെ പാത തെളിയിക്കാനും സമസ്ത മുന്നോട്ട് വന്നിട്ടുണ്ടെന്നും അദ്ദേഹം പറഞ്ഞു.
രാജ്യം ഇന്നനുഭവിക്കുന്ന മതസൗഹാര്‍ദ്ദവും പരസ്പര സ്‌നേഹവും ഊട്ടിയുറപ്പിക്കുന്നതില്‍ സമസ്ത വഹിച്ച പങ്ക് വളരെ വലുതാണെന്നും തങ്ങള്‍ പറഞ്ഞു. ഇതരമതസ്ഥര്‍ ഇരുകൈനീട്ടി സ്വീകരിച്ച വിശുദ്ധ ഇസ്‌ലാമിനെ പൊതുസമൂഹത്തില്‍ തെറ്റിദ്ധരിപ്പിച്ചതില്‍ മുഖ്യപങ്ക് ആദര്‍ശവ്യതിയാനം സംഭവിച്ച പുത്തന്‍വാദികള്‍ക്ക് മാത്രമാണ്. അതിനാല്‍ ഇത്തരം അവാന്തര വിഭാഗങ്ങളുടെ ചിന്താഗതികളില്‍ നിന്ന് ദീനിനെ തനിമയോടെ അവസാനനാള്‍ വരെ സംരക്ഷിക്കലാണ് സമസ്തയുടെ ലക്ഷ്യമെന്നും തങ്ങള്‍ കൂട്ടിച്ചേര്‍ത്തു.