ബിര്‍മിങ്ഹാം: ഓള്‍ ഇംഗ്ലണ്ട് ഓപണ്‍ ബാഡ്മിന്റണ്‍ ചാംപ്യന്‍ഷിപ്പ് വനിതാ സിംഗിള്‍സ് കിരീടം ലോക ഒന്നാം നമ്പര്‍ താരം ചൈനീസ് തായ്‌പേയിയുടെ തായ് സു യിങിന്. ഫൈനലില്‍ മുന്‍ ലോക ചാംപ്യനും അഞ്ചാം സീഡുമായ തായ്‌ലന്‍ഡിന്റെ രത്ചനോക് ഇന്റനോണിനെ പരാജയപ്പെടുത്തിയാണു യിങ് കിരീടം നേടിയത്. സ്‌കോര്‍: 21-16, 22-20. ബാഡ്മിന്റണിലെ ഏറ്റവും പഴക്കം ചെന്ന ടൂര്‍ണമെന്റില്‍ ആദ്യമായാണു ഒരു ചൈനീസ് തായ്‌പേയ് താരം കിരീടം സ്വന്തമാക്കുന്നത്.
പുരുഷ ഡബിള്‍സില്‍ ഇന്തോനേഷ്യയുടെ മാര്‍ക്കസ് ഫെര്‍നാല്‍ഡി ഗിഡിയോണ്‍- സഞ്ജയ സുകമുല്‍ജോ സഖ്യത്തിനാണു കിരീടം. ചൈനയുടെ ലി യുന്‍ഹുയി- ലിയു യുചെന്‍ സഖ്യത്തെ 21-19, 21-14 എന്ന സ്‌കോറിനു പരാജയപ്പെടുത്തി.
ദക്ഷിണ കൊറിയയുടെ ചെങ് യെ ന- ലീ സോ ഹീ സഖ്യത്തിനാണു വനിതാ ഡബിള്‍സ് കിരീടം. ഡെന്‍മാര്‍കിന്റെ കാമില്ല റിറ്റര്‍ ജുല്‍- ക്രിസ്റ്റിന പെഡെര്‍സന്‍ സഖ്യത്തെ 21-18, 21-13 എന്ന സ്‌കോറില്‍ വീഴ്ത്തി.
മിക്‌സ്ഡ് ഡബിള്‍സില്‍ ചൈനയുടെ ലു കെയ്- ഹ്വാങ് യാഖ്യോങ് സഖ്യം പൊരുതി കയറി മലേഷ്യയുടെ പെങ് സൂന്‍ ചന്‍- ലിയു യിങ് ഗോ സഖ്യത്തെ വീഴ്ത്തി ചാംപ്യന്‍മാരായി. സ്‌കോര്‍: 18-21, 21-19, 21-14. നേരത്തെ പുരുഷ സിംഗിള്‍സ് കിരീടം ലോക ഒന്നാം നമ്പര്‍ താരം മലേഷ്യയുടെ ലീ ചോങ് വീ സ്വന്തമാക്കിയിരുന്നു.