തിരുവനന്തപുരം: കേന്ദ്ര സര്‍ക്കാരിന്റെ വിള കയറ്റുമതി നയം കേരളത്തിലെ റബര്‍ കര്‍ഷകരെ വഞ്ചിച്ചുവെന്ന് സ്വതന്ത്ര കര്‍ഷക സംഘം. മുഖ്യമന്ത്രിയും കൃഷിമന്ത്രിയും വിളിച്ചുചേര്‍ത്ത കര്‍ഷക സംഘടനാ നേതാക്കളുടെ യോഗത്തിലാണ് കര്‍ഷക സംഘം അഭിപ്രായം പ്രകടിപ്പിച്ചത്.
കര്‍ഷക പെന്‍ഷന്‍ വര്‍ധിപ്പിക്കുക, കാര്‍ഷിക കടങ്ങള്‍ എഴുതിത്തള്ളുക, നെല്ല്, നാളികേര സംഭരണം കൃത്യസമയത്ത് നടത്തി മുടങ്ങിക്കിടക്കുന്ന തുക എത്രയും വേഗം കൊടുക്കുക, നീര ഉല്‍പാദനത്തില്‍ സര്‍ക്കാര്‍ കൈക്കൊണ്ട നിലപാട് പുനഃപരിശോധിക്കുക, കര്‍ഷകക്ഷേമ ബോര്‍ഡ് രൂപീകരിക്കുക തുടങ്ങിയ ആവശ്യങ്ങള്‍ സ്വതന്ത്ര കര്‍ഷക സംഘം യോഗത്തില്‍ ഉന്നയിച്ചു. സംസ്ഥാന വൈസ് പ്രസിഡന്റ് കെ.യു ബഷീര്‍ ഹാജി, ജില്ലാ സെക്രട്ടറി ജലാലുദ്ദീന്‍ എന്നിവരാണ് യോഗത്തില്‍ പങ്കെടുത്തത്.