കണ്ണൂർ: വളപട്ടണത്ത്   ട്രെയിൻ അട്ടിമറി ശ്രമം. വൻ അപകടം ഒഴിവായി. റെയിൽവേ ട്രാക്കിൽ കോൺക്രിറ്റ് സ്ലാബ് വച്ചാണ് അപായമുണ്ടാക്കാൻ ശ്രമംനടന്നത്. സംഭവത്തിൽ അന്വേഷണം ഊർജിതമാക്കി പോലീസും ആർപിഎഫും.

ഇന്ന് പുലർച്ചെ രണ്ടു മണിയോടെയാണ് സംഭവം. മംഗലാപുരം ഭാഗത്തേക്ക് പോവുകയായിരുന്ന കൊച്ചുവേളി - ഭാവ്നഗർ എക്സ്പ്രസ് ട്രെയിൻ കടന്ന് പോകുന്ന സമയത്താണ് കോൺക്രിറ്റ് സ്ലാബ് കണ്ടെത്തിയത്. സ്ലാബിന് മുകളിൽ  ട്രെയിൻ കയറിയിരുന്നു. ട്രെയിൻ കുലുക്കം അനുഭവപ്പെട്ടതിനെ തുടർന്ന് ലോക്കോ പൈലറ്റ് ഉടൻ ട്രെയിൻ നിർത്തി പരിശോധിച്ചപ്പോഴാണ് തകർന്ന കോൺക്രിറ്റ് സ്ലാബ് കണ്ടെത്തിയത്.  

ALSO READ: വി. അബ്ദുറഹിമാന്റെ ഓഫിസ് അസിസ്റ്റന്റിനെ മരിച്ച നിലയിൽ കണ്ടെത്തി

റോഡുകളിലും ട്രാക്കുകളിലും കാണപ്പെടുന്ന കുഴികൾ കവർ ചെയ്യുന്ന സ്ലാബാണ് ട്രാക്കിൽ കണ്ടെത്തിയത്. വളപട്ടണം റെയിൽവേ സ്റ്റേഷനിൽ നിന്ന് നൂറ് മീറ്റർ മാറിയാണ് ട്രാക്കിൽ തകർന്ന കോൺക്രീറ്റ് സ്ലാബ് കണ്ടെത്തിയത്. സംഭവം നടന്ന ഉടൻ റെയിൽവേ പോലീസും വളപട്ടണം പോലീസും സ്ഥലത്തെത്തി പരിശോധന നടത്തി. സമീപത്തെ സിസിടിവികളടക്കം പോലീസ് പരിശോധിക്കുന്നുണ്ട്. അപകടം ഉണ്ടാക്കാനായി ആരോ മനപൂർവം  കൊണ്ടുവന്നിട്ടതാണെന്ന് റെയിൽവേ പോലീസ് പറഞ്ഞു. എക്സ്പ്രസ് ട്രെയിനിന് തൊട്ട് മുന്നെ രാജധാനി എക്സ്പ്രസ് പോയിരുന്നു. അപ്പോൾ ട്രാക്കിൽ യാതൊരു കുഴപ്പവും ഇല്ലായിരുന്നെന്നും ഇതിന് ശേഷമാണ് ആരോ സ്ലാബ് കൊണ്ടുവന്നിട്ടതാകാനാണ് സാധ്യതയെന്നും റെയിൽവേ പോലീസ് പറഞ്ഞു.

മുൻപും ഈഭാഗങ്ങളിൽ ട്രാക്കിൽ കരിങ്കൽ ചീളുകൾ ഉൾപ്പെടെ വച്ച സംഭവങ്ങൾ ഉണ്ടായിരുന്നു. ഇതേ തുടർന്ന് പോലീസിന്റെ നേതൃത്വത്തിൽ ബോധവത്കരണ പ്രവർത്തനങ്ങൾ ഉൾപ്പെടെ നടത്തിയിരുന്നു.

A potentially disastrous train sabotage attempt was foiled in Valapattanam, Kannur, after a concrete slab was placed on the railway track. Authorities have launched a thorough investigation into the incident, with both police and Railway Protection Force (RPF) teams working to identify the perpetrators behind the attempted derailment [1].