മലപ്പുറം: ജില്ലയിലെ എല്ലാ തദ്ദേശസ്വയംഭരണ സ്ഥാപനങ്ങളും വിമുക്തി പദ്ധതിക്കായി തുക വകയിരുത്തണമെന്നു ജില്ലാ കലക്ടര്‍ അമിത് മീണ. വ്യാജമദ്യ നിര്‍മാര്‍ജ്ജന ജനകീയസമിതിയുടെ ജില്ലാതല യോഗത്തില്‍ അധ്യക്ഷത വഹിച്ച് സംസാരിക്കുകയായിരുന്നു കലക്ടര്‍. മദ്യ വര്‍ജ്ജന നടപടികളുടെ പൂര്‍ണതക്ക് ഉദ്യോഗസ്ഥ, ജനകീയ കൂട്ടായ്മ അനിവാര്യമാണ്. എക്‌സൈസ് വകുപ്പ് സംഘടിപ്പിക്കുന്ന റെയ്ഡുകളില്‍ അതത് തദ്ദേശ സ്ഥാപന പ്രതിനിധികളെ കൂടി ഉള്‍പ്പെടുത്താനും കലക്ടര്‍ നിര്‍ദ്ദേശിച്ചു. ഏറെ ജനസാന്ദ്രതയും വിസ്തൃതിയുമുള്ള ജില്ലയില്‍ എക്‌സൈസ് വകുപ്പിനു കൂടുതല്‍ ജീവനക്കാരെയും വാഹനവും അനുവദിക്കണമെന്നു സര്‍ക്കാറിനോട് ആവശ്യപ്പെടാന്‍ യോഗം തീരുമാനിച്ചു. അടുത്ത അധ്യയന വര്‍ഷാരംഭത്തില്‍ തന്നെ ജില്ലയിലെ മുഴുവന്‍ സ്‌കൂളുകളിലും ബോധവല്‍ക്കരണ ക്ലാസുകള്‍ സംഘടിപ്പിക്കും. കൊണ്ടോട്ടി നഗരസഭ ചെയര്‍മാന്‍ സി. നാടിക്കുട്ടി, ബ്ലോക്ക് പഞ്ചായത്ത് പ്രസിഡന്റുമാരായ കെ. സലീന ടീച്ചര്‍, അബ്ദുല്‍ കലാം, പറമ്പന്‍ ലക്ഷ്മി, സംഘടനാ പ്രതിനിധികളായ പി.എ മജീദ്, ഹംസ പാലൂര്‍, പി.കെ നാരായണന്‍, ഖാദര്‍ തേഞ്ഞിപ്പലം, എക്‌സൈസ് ഡെപ്യൂട്ടി കമ്മിഷണര്‍ കെ. മുഹമ്മദ് ബഷീര്‍, റവന്യൂ, പൊലിസ്, എക്‌സൈസ് ഉദ്യോഗസ്ഥര്‍ പങ്കെടുത്തു.