കൊച്ചി: വരാപ്പുഴ കസ്റ്റഡികൊലക്കേസില്‍ പൊലിസിനെ വീണ്ടും പ്രതിക്കൂട്ടിലാക്കി ഹൈക്കോടി റിപ്പോര്‍ട്ട്. ശ്രീജിത്തിനെ ഹാജരാക്കിയപ്പോള്‍ മജിസ്‌ട്രേറ്റ് കാണാന്‍ വിസമ്മതിച്ചുവെന്ന പൊലിസിന്റെ പരാതിയിലാണ് ഹൈക്കോടതി അന്വേഷണം നടത്തി റിപ്പോര്‍ട്ട് സമര്‍പ്പിച്ചത്. കസ്റ്റഡിയിലെടുത്തെങ്കിലും ശ്രീജിത്തിനെ മജിസ്‌ട്രേറ്റിന്റെ മുന്നില്‍ ഹാജരാക്കിയിരുന്നില്ലെന്നും പരാതി വ്യാജമാണെന്നുമാണ് കണ്ടെത്തല്‍.

അതിനിടെ, ആലുവ റൂറല്‍ എസ്.പിയായിരുന്ന എ.വി.ജോര്‍ജിനെ രക്ഷിക്കാന്‍ ശ്രമിക്കുകയാണെന്ന ആരോപണവുമായി കൊല്ലപ്പെട്ട ശ്രീജിത്തിന്റെ കുടുംബം രംഗത്തെത്തി. ജോര്‍ജിനെ രക്ഷപ്പെടുത്താന്‍ വേണ്ടിയാണ് രണ്ട് തവണ ചോദ്യം ചെയ്ത് വിട്ടയച്ചത്. കൊന്നവരെ മാത്രമല്ല, കൊല്ലിച്ചവരെയും പിടികൂടണം. സംഭവത്തിന്റെ സത്യാവസ്ഥ പുറത്ത് വരാന്‍ സി.ബി.ഐ അന്വേഷണം തന്നെ വേണമെന്നും കുടുംബം ആവശ്യപ്പെട്ടു.