കാന്‍പൂര്‍: ഉത്തര്‍പ്രദേശിലെ കാന്‍പൂരില്‍ ശീതീകരണ ശാലയിലുണ്ടായ സ്‌ഫോടനത്തെതുടര്‍ന്ന് കെട്ടിടം തകര്‍ന്ന് ആറുപേര്‍ മരിച്ചു. കാന്‍പൂരിനടുത്ത ശിവരാജ്പൂരിലാണ് അപകടമുണ്ടായ ശീതീകരണശാല പ്രവര്‍ത്തിക്കുന്നത്. അപകടത്തില്‍ എട്ടു പേര്‍ക്ക് പരുക്കേറ്റു. സ്ഥാപനത്തിന്റെ ഉടമയും മകനുമടക്കം 20 പേര്‍ കെട്ടിടാവശിഷ്ടങ്ങള്‍ക്കിടയില്‍ കുടുങ്ങിക്കിടക്കുകയാണെന്നാണ് വിവരം. ഇവരെ രക്ഷപ്പെടുത്താനുള്ള ശ്രമങ്ങള്‍ നടന്നുകൊണ്ടിരിക്കുകയാണെന്ന് പൊലിസ് അറിയിച്ചു. കൊല്ലപ്പെട്ടവരില്‍ അഞ്ച് പേര്‍ ബിഹാര്‍ സ്വദേശികളാണ്. ഗ്യാസ് ചോര്‍ച്ചയെ തുടര്‍ന്നുള്ള പൊട്ടിത്തെറിയിലാണ് കെട്ടിടം തകര്‍ന്നത്.
അപകടം നടക്കുമ്പോള്‍ വളം വാങ്ങാനെത്തിയ കര്‍ഷകരും ജീവനക്കാരുമടക്കം നിരവധി പേര്‍ കെട്ടിടത്തില്‍ ഉണ്ടായിരുന്നു. ഇന്നലെ ഉച്ചയോടെ ഗ്യാസ് ചോര്‍ച്ച തുടങ്ങിയിരുന്നു.
തുടര്‍ന്നുണ്ടായ പൊട്ടിത്തെറിയില്‍ കെട്ടിടത്തിന്റെ മുകള്‍ ഭാഗം തകര്‍ന്ന് വീഴുകയായിരുന്നെന്ന് അധികൃതര്‍ വ്യക്തമാക്കി. സംഭവസ്ഥലത്ത് അമോണിയ ചോര്‍ന്നതിനാല്‍ രക്ഷാപ്രവര്‍ത്തനങ്ങള്‍ വൈകിയാണ് തുടങ്ങിയത്. രക്ഷാപ്രവര്‍ത്തനത്തിന് സൈന്യത്തിന്റെ സഹായം തേടിയിട്ടുണ്ട്.