എടച്ചേരി: വാഹന തടസം സൃഷ്ടിക്കാതെ മാതൃകാപരമായി നടത്തിയ വിഖായ റാലിക്ക് പൊലിസിന്റെ അഭിനന്ദനം. കഴിഞ്ഞ ദിവസം പുതിയങ്ങാടി ടൗണില്‍ എടച്ചേരി മേഖല എസ്.കെ.എസ്.എസ് എഫ് സംഘടിപ്പിച്ച വിഖായ റാലിയാണ് ജനങ്ങളുടെയും പൊലിസിന്റെയും ശ്രദ്ധ നേടിയത്.
മേഖലാ എസ്.കെ.എസ്.എസ്.എഫ് ആദര്‍ശ സമ്മേളനത്തോടനുബന്ധിച്ച് ഏറെ അച്ചടക്കത്തോടെ നടത്തിയ റാലിയില്‍ 200 തെരെഞ്ഞെടുക്കപ്പെട്ട വളണ്ടിയര്‍മാരാണ് പങ്കെടുത്തത്. മിതമായ ശബ്ദത്തില്‍ ഇവര്‍ മുഴക്കിയ ആകര്‍ഷകമായ മുദ്രാവാക്യങ്ങളും മുഴുവന്‍ പ്രവര്‍ത്തകരും പ്രത്യേക യൂനിഫോമില്‍ അണിനിരന്നതും കാണികളില്‍ മതിപ്പുളവാക്കി. ഒരു ചെറിയ പ്രകടനം നടക്കുമ്പോള്‍ പോലും മണിക്കൂറുകളോളം പൊതുനിരത്തില്‍ വാഹനങ്ങള്‍ കെട്ടിക്കിടക്കേണ്ടി വരുന്ന കാലഘട്ടത്തില്‍ വാഹനങ്ങള്‍ക്ക് തടസം സൃഷ്ടിക്കാതെ പ്രകടനം നടത്തിയ എസ്.കെ.എസ്.എസ്.എഫ് പ്രവര്‍ത്തകരെ എടച്ചേരി എസ്.ഐ.പ്രദീപ് കുമാര്‍ പ്രശംസിച്ചു.
എടച്ചേരി കളിയാം വെള്ളിയില്‍ നിന്ന് ആരംഭിച്ച പ്രകടനം തലായിയില്‍ സമാപിച്ചു.റാലിക്ക് എസ് വൈ എസ് നാദാപുരം മണ്ഡലം ജന:സിക്രട്ടറി ഹാരിസ് റഹ്മാനി, മേഖല എസ്.കെ.എസ് എസ്.എഫ്. പ്രസിഡന്റ് മുനീര്‍ പുറമേരി,ജബ്ബാര്‍ മൗലവി, റാഫി റഹ്മാനി,ശാദുലി ഹാജി, സത്താര്‍ കുറിഞ്ഞാലിയോട്, സലാം കച്ചേരി, ജാബിര്‍ എടച്ചേരി,റഷീദ് പുത്തന്‍പള്ളി,ജബ്ബാര്‍ കുറിഞ്ഞാലിയോട്,സവാദ് എടച്ചേരി,മുഹമ്മദ് ചിറയില്‍, അബ്ദുല്ല പുതുശ്ശേരി, അബ്ദുല്ല റഹ്മാനി, ഇസ്മായില്‍ എന്നിവര്‍ നേതൃത്വം നല്‍കി.