വടകര: ഒന്തം റോഡില്‍ യുവതിക്കും മക്കള്‍ക്കും വെട്ടേറ്റു. ഒന്തം റോഡ് കുന്നിന്‍പുറം ചിത്ര(43), മക്കളായ മണികണ്ഠന്‍(17), ആതിര (16) എന്നിവര്‍ക്കാണ് വെട്ടേറ്റത്. ചിത്രയുടെ സഹോദരന്‍ ചന്ദ്രനും മകന്‍ പ്രശാന്തും ചേര്‍ന്നാണ് അക്രമിച്ചതെന്ന് പൊലിസിനു നല്‍കിയ പരാതിയില്‍ പറയുന്നു. ബുധനാഴ്ച 12ഓടെയായിരുന്നു സംഭവം. വീട്ടില്‍ അതിക്രമിച്ചു കയറിയ ചന്ദ്രനും പ്രശാന്തും കൊടുവാള്‍ കൊണ്ട് ചിത്രയെയും മക്കളെയും വെട്ടുകയായിരുന്നു. സാരമായ പരുക്കേറ്റ ചിത്രയെയും മക്കളെയും വടകര ജില്ലാ ആശുപത്രിയില്‍ പ്രവേശിപ്പിച്ചു.
അതേസമയം കുടുംബവഴക്കിനെ തുടര്‍ന്നാണ് അക്രമമുണ്ടായതെന്ന് പൊലിസ് പറയുന്നു. കഴിഞ്ഞയാഴ്ച ചന്ദ്രന്റെ മകനെ ചിത്രയുടെ മകനും കൂട്ടുകാരും ചേര്‍ന്ന് അക്രമിച്ചിരുന്നു. ഇതിനു പകരമായാണ് ചിത്രയെയും കുട്ടികളെയും അക്രമിച്ചത്. രണ്ട് സംഭവത്തിലും കേസെടുത്തതായി പൊലിസ് പറഞ്ഞു.