തുറവൂര്‍: ദീര്‍ഘനാളത്തെ കാത്തിരിപ്പിനൊടുവില്‍ പള്ളിത്തോട് ആശുപത്രിയില്‍ കിടത്തി ചികിത്സ സൗകര്യമൊരുങ്ങുന്നു.
ഇരു നിലകളിലായി മുപ്പത്തിനാലു കിടക്കകളോട് കൂടിയതാണ് പുതിയ കെട്ടിടം. ഇതോടൊപ്പം ഡോക്ടര്‍മാര്‍ക്കും നഴ്‌സുമാര്‍ക്കുമുള്ള പരിശോധന മുറിയും റാക്കും ഉള്‍പ്പടെയുള്ള സൗകര്യങ്ങളാണ് ഒരുക്കുന്നത്.  1.68 കോടി ചെലവഴിച്ച് കേരള സംസ്ഥാന തീരദേശ വികസന കോര്‍പഘേഷന്റെ പദ്ധതി പ്രകാരമാണ് കെട്ടിടം നിര്‍മ്മിക്കുന്നത്.
കരുനാഗപ്പള്ളിയിലെ  നിര്‍മ്മാണ കമ്പനിക്കാണ് നിര്‍മാണ ചുമതല. റൂറല്‍ ഏരിയ ഡവലപ്‌മെന്റ് ഫണ്ട് ട്രാജോ 19  ഉപയോഗിച്ചാണ് നിര്‍മാണ പ്രവര്‍ത്തനങ്ങള്‍ പുരോഗമിക്കുന്നത്. 471 ചതുരശ്ര അടി വിസ്തീര്‍ണമുളള ഇരുനില കെട്ടിടമാണിത്. പുതിയ ഐ. പി ബ്ലോക്ക് നിര്‍മ്മിക്കുന്നതോടെ അഴീക്കല്‍ മുതല്‍ ചെല്ലാനം വരെയുള്ള തീരദേശത്തെ ജനങ്ങള്‍ക്ക് ഏറെ പ്രയോജനകരമായിരിക്കും. നിലവില്‍ തുറവൂര്‍, ചേര്‍ത്തല ആശുപത്രികളെയാണ്  പ്രദേശവാസികള്‍ ആശ്രയിക്കുന്നത്. വര്‍ഷങ്ങളായി തീരദേശ ജനത അനുഭവിക്കുന്ന ദുരിതങ്ങള്‍ക്ക് ഇതോടെ പരിഹാരമാകുമെന്നാണ് നാട്ടുകാരുടെ പ്രതീക്ഷ.