ആലക്കോട്: ചിറ്റടി എ.എല്‍.പി സ്‌കൂളില്‍ പൊതു വിദ്യാഭ്യാസം സംരക്ഷിക്കുന്നതിന്റെ ഭാഗമായി എസ്.എസ്.എയുടെ ആഭിമുഖ്യത്തില്‍ ബാലോല്‍സവം പരിപാടി സംഘടിപ്പിച്ചു.
അങ്കണവാടിയില്‍ നിന്ന് ഒന്നാം ക്ലാസിലേക്ക് എത്തുന്ന കുട്ടികള്‍ക്ക് തുടക്കത്തില്‍ തന്നെ മാനസികോല്ലാസം പ്രദാനം ചെയ്യുക എന്നതും പദ്ധതിയില്‍ ലക്ഷ്യമിടുന്നു.
അധ്യാപകരും പി.ടി.എ അംഗങ്ങളും ചേര്‍ന്ന് കുട്ടികളെ സ്വീകരിച്ചു.
ആദ്യമായി സ്‌കൂളില്‍ എത്തിയതിന്റെ ആകാംഷ പലരിലും ദൃശ്യമായി. സ്‌കൂള്‍ മുറ്റത്തെ   പൂന്തോട്ടവും ചുമര്‍ ചിത്രങ്ങളും കണ്ടതോടെ പലര്‍ക്കും സന്തോഷം അടക്കാനായില്ല.
വാര്‍ഡ് മെമ്പര്‍ ടി ചന്ദ്രമതി പരിപാടി ഉദ്ഘാടനം ചെയ്തു. പി.ടി.എ പ്രസിഡന്റ് പ്രകാശ് ബാബു അധ്യക്ഷനായി. തോമസ് കെ വര്‍ഗീസ്, കെ.വി അനില്‍ കുമാര്‍, പി.വി ബിന്ദു സംസാരിച്ചു.