ചെന്നൈ: നുങ്കമ്പാക്കം റെയില്‍വേ സ്റ്റേഷനില്‍ യുവതിയെ കുത്തിക്കൊലപ്പെടുത്തിയ ആളുടേതെന്നു സംശയിക്കുന്ന സി.സി ടിവി ദൃശ്യങ്ങള്‍ പൊലിസ് പുറത്തുവിട്ടു. ബാഗുമായി നടന്നുനീങ്ങുന്ന ഒരു യുവാവിന്റെ ദൃശ്യമാണ് പൊലിസ് പുറത്തുവിട്ടത്.

ഇന്നലെ രാവിലെ 6.30ന് ജോലി സ്ഥലത്തേക്ക് പോകാനായി ട്രെയിന്‍ കാത്തുനില്‍ക്കുമ്പോഴായിരുന്നു സംഭവം. 24 കാരിയായ എസ്.സ്വാതിയാണ് കൊല്ലപ്പെട്ടത്.

ട്രെയിന്‍ കാത്തു നില്‍ക്കുന്നതിനിടെ പച്ച ഷര്‍ട്ടും കറുത്ത പാന്റും ധരിച്ചെത്തിയ ചെറുപ്പക്കാരന്‍ പെണ്‍കുട്ടിയുടെ സമീപത്തു വരികയും അവര്‍ തമ്മില്‍ വാക്കേറ്റമുണ്ടാവുകയും പിന്നീട് കയ്യിലുണ്ടായിരുന്ന ആയുധം ഉപയോഗിച്ച് ഇയാള്‍ പെണ്‍കുട്ടിയെ കുത്തിവീഴ്ത്തുകയുമായിരുന്നെന്ന് ദൃക്‌സാക്ഷികള്‍ പറഞ്ഞു.

മാരകമായി മുറിവേറ്റ പെണ്‍കുട്ടി സംഭവ സ്ഥലത്തുവച്ചുതന്നെ മരിച്ചിരുന്നു. രണ്ട് മണിക്കൂറ് കഴിഞ്ഞ് പൊലിസെത്തിയാണ് പെണ്‍കുട്ടിയുടെ മൃതദേഹം പ്ലാറ്റ്‌ഫോമില്‍ നിന്നും മാറ്റിയത്.