കുളത്തൂര്‍: യുവാവിനെ ബിയര്‍ കുപ്പികൊണ്ട് തലക്കടിച്ച് പരുക്കേല്‍പ്പിച്ച സംഭവത്തില്‍ രണ്ടുപേര്‍ അറസ്റ്റില്‍.
നിരവധി കേസുകളില്‍ പ്രതിയായ കുളത്തൂര്‍,പുല്ലുകാട് ,കല്ലിടാഞ്ഞി വീട്ടില്‍ പുല്ലുകാട് ഷിബു എന്നുവിളിക്കുന്ന ഷിബു (35 ), പുല്ലുകാട് കുന്നും പുറത്തുവീട്ടില്‍ സുബീഷ് (32 ) എന്നിവരാണ് അറസ്റ്റിലായത്. കുളത്തൂര്‍ പുല്ലുകാട് സ്വദേശി സുനില്‍രാജിനെ (36 ) യാണ് ഇവര്‍ ആക്രമിച്ചത്.
അക്രമത്തില്‍ തലയ്ക്ക് ആഴത്തില്‍ മുറിവേറ്റ സുനില്‍ രാജിനെ സ്വകാര്യ ആശുപത്രിയില്‍ പ്രവേശിപ്പിച്ചു. ഇന്നലെ ഉച്ചക്ക് മൂന്നുമണിയോടെ പുല്ലുകാട് എസ്.എന്‍.ഡി.പി. ഹാളിന് സമീപത്തായിരുന്നു സംഭവം.
പ്രതികള്‍ ഗുണ്ടാപിരിവ് ആവശ്യപ്പെട്ടിട്ട് നല്‍കാത്തതാണ് ആക്രമിക്കാന്‍ കാരണമെന്ന് പൊലിസ് പറഞ്ഞു. പ്രതി പുല്ലുകാട് ഷിബു 2014 ല്‍ കാപ്പ നിയമപ്രകാരം ശിക്ഷ അനുഭവിച്ചിട്ടുള്ളയാളാണ്.