കൊട്ടാരക്കര: കോട്ടാത്തല പണയില്‍ ജങ്ഷനില്‍ കെ.എസ്.ആര്‍.ടി.സി സൂപ്പര്‍ ഡീലക്‌സ് എയര്‍ ബസും ലോറിയുമായി കൂട്ടിയിടിച്ചു, ബസിലുണ്ടായിരുന്ന നാല് പേര്‍ക്ക് പരുക്ക്.
രാവിലെ 8.35നായിരുന്നു സംഭവം. ബസിന്റെ ഡ്രൈവര്‍ തിരുവനന്തപുരം സ്വദേശി റോസ് കുമാര്‍(42)ന് കാലിന് സാരമായ പരുക്കേറ്റു. മറ്റ് മൂന്ന് പേര്‍ സ്ത്രീകളാണ്. ഇതില്‍ ഒരാളുടെ മൂക്കിന് പരുക്കേറ്റിട്ടുണ്ട്. നാല് പേരെയും കൊട്ടാരക്കര താലൂക്ക് ആശുപത്രിയില്‍ പ്രവേശിപ്പിച്ചു. തിരുവനന്തപുരം ഡിപ്പോയിലേതാണ് ബസ്. കര്‍ണ്ണാടകയിലെ സുല്ലിയാറിലേക്ക് പുതുതായി ആരംഭിച്ച സര്‍വിസാണിത്.
സുല്ലിയാറില്‍ നിന്നും കണ്ണൂര്‍ വഴി തിരുവനന്തപുരത്തേക്ക് വരികയായിരുന്ന ബസ് കൊട്ടാരക്കര  പുത്തൂര്‍ റോഡില്‍ കോട്ടാത്തല പണയില്‍ ജങ്ഷനില്‍ വച്ച് എതിരേ വന്ന ലോറിയുടെ മുന്‍ഭാഗത്തേക്ക് ഇടിച്ചുകയറുകയായിരുന്നുവെന്നാണ് ദൃക്‌സാക്ഷികള്‍ പറയുന്നത്.
തമിഴ്‌നാട്ടില്‍ നിന്നും അരിയുമായി വരികയായിരുന്നു ലോറി. കോട്ടയം ഭാഗത്ത് നിന്നു ബസില്‍ കയറിയവര്‍ക്കാണ് പരുക്കേറ്റത്. ചാഞ്ഞ് കിടക്കുന്നവിധത്തിലുള്ള സീറ്റുകളായതിനാല്‍ കൂടുതല്‍ പേര്‍ പരുക്കേല്‍ക്കാതെ രക്ഷപ്പെട്ടു. ബസിന്റെ മുന്‍ഭാഗത്ത് ഇരുന്നവര്‍ക്ക് മാത്രമാണ് പരുക്കേറ്റത്. കൊട്ടാരക്കര പൊലിസ് കേസെടുത്തു.