ന്യൂഡല്‍ഹി: ഐ.പി.എല്‍ പോരാട്ടത്തില്‍ ഡല്‍ഹി ഡയര്‍ഡെവിള്‍സിന് സ്വന്തം തട്ടകത്തില്‍ ആശ്വാസ വിജയം. ചെന്നൈ സൂപ്പര്‍ കിങ്‌സിനെ അവര്‍ 34 റണ്‍സിന് പരാജയപ്പെടുത്തി. പ്ലേയോഫ് ഉറപ്പിച്ച ചെന്നൈക്കും ടൂര്‍ണമെന്റിലെ പ്രതീക്ഷകള്‍ അവസാനിച്ച ഡല്‍ഹിക്കും മത്സര ഫലം നിര്‍ണായകമല്ല. ടോസ് നേടി ചെന്നൈ ബൗളിങ് തിരഞ്ഞെടുക്കുകയായിരുന്നു. ആദ്യം ബാറ്റ് ചെയ്ത ഡല്‍ഹി നിശ്ചിത 20 ഓവറില്‍ അഞ്ച് വിക്കറ്റ് നഷ്ടത്തില്‍ 162 റണ്‍സെടുത്തു. മറുപടി പറഞ്ഞ ചെന്നൈയുടെ പോരാട്ടം 20 ഓവറില്‍ ആറ് വിക്കറ്റ് നഷ്ടത്തില്‍ 128 റണ്‍സില്‍ അവസാനിപ്പിച്ചാണ് ഡല്‍ഹി വിജയിച്ചത്. ചെന്നൈ നിരയില്‍ അമ്പാട്ടി റായിഡു 29 പന്തില്‍ നാല് വീതം സിക്‌സും ഫോറും പറത്തി 50 റണ്‍സെടുത്തു. ജഡേജ 27 റണ്‍സുമായി പുറത്താകാതെ നിന്നു. ഡല്‍ഹിക്കായി ട്രെന്റ് ബോള്‍ട്ട്, അമിത് മിശ്ര രണ്ട് വിക്കറ്റെടുത്തു.
26 പന്തില്‍ മൂന്ന് ഫോറും രണ്ട് സിക്‌സും സഹിതം 38 റണ്‍സെടുത്ത റിഷഭ് പന്താണ് ഡല്‍ഹിയുടെ ടോപ് സ്‌കോറര്‍. പുറത്താകാതെ 36 റണ്‍സ് വീതം അടിച്ചെടുത്ത വിജയ് ശങ്കര്‍, ഹര്‍ഷല്‍ പട്ടേല്‍ എന്നിവരും തിളങ്ങി. നാല് സിക്‌സും ഒരു ഫോറുമടക്കം ഹര്‍ഷല്‍ 16 പന്തില്‍ 36 റണ്‍സ് വാരിയപ്പോള്‍ വിജയ് ശങ്കര്‍ രണ്ട് വീതം സിക്‌സും ഫോറും സഹിതം 28 പന്തിലാണ് 36 റണ്‍സ് കണ്ടെത്തിയത്.