സെര്‍ച്ച് ഭീമന്‍ ഗൂഗിള്‍ ഗാഡ്ജറ്റ് രംഗത്തും ആധിപത്യം സ്ഥാപിക്കാനുള്ള ശ്രമത്തിലാണിപ്പോള്‍. ആപ്പിള്‍, സാംസങ്, ഹുവായ് പോലെയുള്ള കമ്പനികള്‍ക്ക് വെല്ലുവിളിയായി ഗൂഗിളിന്റെ സ്മാര്‍ട്ട്‌ഫോണെത്തുമെന്നാണ് ടെലഗ്രാഫ് യു.കെ റിപ്പോര്‍ട്ട് ചെയ്യുന്നത്.

ഗൂഗിളിന്റെ സ്വന്തം ഹാര്‍ഡ് വെയറുകളും സോഫ്റ്റ് വെയറും ഉപയോഗിച്ചു തന്നെയായിരിക്കും ഫോണിന്റെ നിര്‍മാണം. ഈ വര്‍ഷാവസാനത്തില്‍ ഫോണ്‍ എത്തുമെന്നാണ് ഗാഡ്ജറ്റ് ലോകം കരുതുന്നത്. നിലവില്‍ വിവിധ കമ്പനികളുമായി ചേര്‍ന്ന് നെക്‌സസ് ഫോണുകള്‍ ഇറക്കുന്ന ഗൂഗിള്‍ ഭാവിയില്‍ സ്മാര്‍ട്ട്‌ഫോണ്‍ മേഖലയ്ക്ക് കൂടുതല്‍ ഊന്നല്‍ നല്‍കുമെന്ന് ഗൂഗിള്‍ സി.ഇ.ഒ സുന്ദര്‍ പിച്ചൈ പറഞ്ഞിരുന്നു.

മോട്ടറോള, ഹുവായ്, എല്‍.ജി കമ്പനികളുമായി ചേര്‍ന്നാണ് ഇപ്പോള്‍ ഗൂഗിളിന്റെ നെക്‌സസ് ഫോണുകള്‍ പുറത്തിറിക്കുന്നത്. ആന്‍ഡ്രോയിഡിന്റെ ഏറ്റവും മുന്തിയ പ്രത്യേകതകള്‍ നെക്‌സസ് ഫോണിലൂടെ ലഭിക്കുമെന്നാണ് ഗൂഗിളിന്റെ അവകാശവാദം. ആന്‍ഡ്രോയിഡിന്റെ പുതിയ വേര്‍ഷന്‍ പുറത്തുവരുമ്പോള്‍ ആദ്യമെത്തുന്നത് നെക്‌സസ് ഫോണുകള്‍ക്കാണ്.