കോഴിക്കോട്: കല്‍ബുര്‍ഗി നഴ്‌സിങ് കോളജില്‍ വച്ച് റാഗിങ്ങിനിരയായി കോഴിക്കോട് മെഡിക്കല്‍ കോളജില്‍ ചികിത്സയില്‍ കഴിയുന്ന ദലിത് പെണ്‍കുട്ടിയെ സംസ്ഥാന പട്ടികജാതി-പട്ടികവര്‍ഗ കമ്മിഷന്‍ അംഗങ്ങളായ അഡ്വ. കെ.കെ മനോജ്, ഏഴുകോണ്‍ നാരായണന്‍ എന്നിവര്‍ സന്ദര്‍ശിച്ചു. കമ്മിഷന്‍ അംഗങ്ങള്‍ പെണ്‍കുട്ടിയുടെ ആരോഗ്യസ്ഥിതി വിലയിരുത്തി. പെണ്‍കുട്ടിയുടെ ചികിത്സാര്‍ഥം വിദഗ്ധ ഡോക്ടര്‍മാര്‍ അടങ്ങിയ മെഡിക്കല്‍ ബോര്‍ഡ് രൂപീകരിച്ചതായി മെഡിക്കല്‍ കോളജ് പ്രിന്‍സിപ്പല്‍ ഡോ. വി.പി ശശിധരന്‍ കമ്മിഷന്‍ അംഗങ്ങളെ അറിയിച്ചു.
പട്ടികജാതി-പട്ടികവര്‍ഗ പീഡനിരോധന നിയമപ്രകാരമുള്ള ധനസഹായത്തിന്റെ 25 ശതമാനം തുക ഉടന്‍ പെണ്‍കുട്ടിക്ക് നല്‍കും. കൂടാതെ പ്രത്യേക കേസായി പരിഗണിച്ച് പെണ്‍കുട്ടിയുടെ സഹോദരിക്ക് വിവാഹ ധനസഹായമായി 50,000 രൂപയും കുടുംബത്തിന് വീട് നിര്‍മിക്കുന്നതിനുള്ള ധനസഹായവും നല്‍കും. കൂടാതെ പെണ്‍കുട്ടിയുടെ തുടര്‍ പഠനത്തിനുള്ള സാഹചര്യവുമൊരുക്കും. കമ്മിഷന്‍ അംഗങ്ങളെ ജില്ലാ കലക്ടര്‍ എന്‍. പ്രശാന്ത്, എ.ഡി.എം പി. ജനില്‍കുമാര്‍, ജില്ലാ പട്ടികജാതി ഓഫിസര്‍ എം.പി സജിത് അനുഗമിച്ചു.