ബദിയഡുക്ക: ബദിയഡുക്ക പഞ്ചായത്തിലെ വിവിധ മേഖലകളില്‍ പനി പടരുന്നു. 13ാം വാര്‍ഡ് പട്ടാജെയില്‍ ഡെങ്കിപ്പനിയെന്ന സംശയത്തെ തുടര്‍ന്ന് ആറുപേരെ വൈദ്യപരിശോധനക്ക് വിധേയമാക്കി. ഇവരില്‍ രണ്ടുപേരെ മംഗളുരുവിലെ ആശുപത്രിയില്‍ പ്രവേശിപ്പിച്ചു.
പട്ടാജെയിലെ ബാലകൃഷ്ണ (40), മധു (48), മഹാലിംഗ നായക് (50), നാരായണ മണിയാണി (46) പ്രദീപ് കുമാര്‍ (18), ചന്ദ്രാവതി (35) എന്നിവരെയാണ് വൈദ്യ പരിശോധനക്കു വിധേയമാക്കിയത്. ഡെങ്കിലക്ഷണം സ്ഥീരികരിച്ചതിനെ തുടര്‍ന്ന് ബാലകൃഷ്ണയെയും മധുവിനെയും മംഗളുരുവിലെ വെന്‍ലോക്ക് ആശുപത്രിയിലേക്ക് വിദഗ്ധ ചികിത്സക്കായി മാറ്റി. പനിയുടെ ലക്ഷണം കണ്ടെത്തിയിട്ടും പകര്‍ച്ച വ്യാധി തടയുവാനുള്ള മഴക്കാല പൂര്‍വ്വ ശുചീകരണ പ്രവര്‍ത്തനങ്ങള്‍ ബദിയഡുക്കയില്‍ നടന്നിട്ടില്ല.
ടൗണിലെ ചില ഓടകള്‍ അടഞ്ഞു കിടക്കുമ്പോള്‍ മറ്റു ചില ഓടകളില്‍ ടൗണില്‍ പ്രവര്‍ത്തിക്കുന്ന ചില ഹോട്ടലുകളില്‍ നിന്നും ബേക്കറി ശീതള പാനിയ കടകളില്‍ നിന്നും മലിനജലം ഒഴുക്കി വിടുകയാണ്.
മലിനജലം ബദിയഡുക്ക കുമ്പള റോഡരികില്‍ പാതയോരത്ത് കാംപ്‌കോയ്ക്കു മുമ്പില്‍ ടെംപോ സ്റ്റാന്‍ഡിനു മുന്‍വശം ഓടകളില്‍ ഒഴുക്കി വിടുന്നത് മൂലം ദുര്‍ഗന്ധം വമിച്ചു മൂക്കുപൊത്തി വേണം ഇതുവഴി കടന്നുപോകാന്‍. ആഴ്ചചന്ത നടക്കുന്ന സ്ഥലത്തെ മാലിന്യങ്ങളും തള്ളുന്നതും ഇതേ ഓടയിലാണ്.
അതേ സമയം ടൗണില്‍ കെട്ടി കിടക്കുന്ന മാലിന്യങ്ങള്‍ നീക്കം ചെയ്യാന്‍ അടിയന്തിര നടപടി സ്വീകരിക്കുമെന്നും ശുചീകരണത്തിന്റെ പേരില്‍ ആരെങ്കിലും പണം തട്ടിയെടുത്തിട്ടുണ്ടെങ്കില്‍ അവര്‍ക്കെതിരേ നടപടി സ്വീകരിക്കുമെന്നും പഞ്ചായത്ത് പ്രസിഡന്റ് കെ.എന്‍ കൃഷ്ണ ഭട്ട് പറഞ്ഞു.