ഉളിക്കല്‍: കനത്ത മഴയെ തുടര്‍ന്ന് കര്‍ണാടക ഉള്‍വനത്തില്‍ ഉരുള്‍പൊട്ടി. വയത്തൂര്‍, വട്ട്യാംതോട്, മാട്ടറ ചപ്പാത്ത് പുഴകള്‍ കരകവിഞ്ഞൊഴുകി. ഇതേതുടര്‍ന്ന് വയത്തൂര്‍ -മണിപ്പാറ, വട്ട്യാംതോട്- മണിക്കടവ്, മാട്ടറ- മണിക്കടവ് ഭാഗത്തേക്ക് വാഹന ഗതാഗതം തടസപ്പെട്ടു.
പൊയ്യൂര്‍കരി കോക്കാട് ഭാഗങ്ങളില്‍ വെള്ളം കയറി. പൊയ്യൂര്‍കരി പാടശേഖരത്തില്‍ വെള്ളം കയറി ഏക്കറു കണക്കിന് നെല്‍ കൃഷി നശിച്ചു.
താഴ്ന്ന പ്രദേശങ്ങള്‍ മുഴുവന്‍ വെള്ളത്തിനടിയിലാണ്. പ്രദേശങ്ങളിലെ കൃഷിയും വ്യാപകമായി നശിച്ചു. പുഴയുടെ ഇരു കരകളിലും താഴ്ന്ന പ്രദേശങ്ങളിലും താമസിക്കുന്നവര്‍ക്ക് പൊലിസ് ജാഗ്രതാ നിര്‍ദേശം നല്‍കി.