അമ്പലപ്പുഴ: ഒന്നര കോടിയുടെ നിരോധിച്ച നോട്ടുകള്‍ നശിപ്പിച്ചതായി അറസ്റ്റിലായ ധനകാര്യ സ്ഥാപന ഉടമയുടെ മൊഴി. അമ്പലപ്പുഴ ജംഗ്ഷന് സമീപം തെക്കേ മഠം ഫൈനാന്‍സ് എന്ന ചിട്ടിക്കമ്പനി നടത്തിയിരുന്ന ആമയിയിട തെക്കെ മഠത്തില്‍ മോഹന പണിക്കര്‍ (55) അമ്പലപ്പുഴ പൊലിസിന് നല്‍കിയ മൊഴിയിലാണ് ഈ ഞെട്ടിയ്ക്കുന്ന വിവരം.

നോട്ടു നിരോധനത്തോടെ പുതിയ നോട്ടുകള്‍ മാറ്റിയെടുക്കാന്‍ കഴിയാതെ വന്നതോടെയാണ് ഇത് നശിപ്പിക്കേണ്ടി വന്നതെന്നാണ് ഇയാളുടെ മൊഴി.

ഫൈനാന്‍സ് സ്ഥാപനം നടത്തി വന്ന മോഹന പണിക്കര്‍ നിക്ഷേപകരുടെ 3.5 കോടി രൂപയുമായി മുങ്ങുകയും തുടര്‍ന്ന് നിക്ഷേപകര്‍ അമ്പലപ്പുഴ പൊലിസില്‍ പരാതി നല്‍കുകയുമായിരുന്നു.

പിന്നീട് ഇയാള്‍ ഒളിവില്‍ കഴിയുന്നുവെന്ന രഹസ്യവിവരം ലഭിച്ചതിനെ തുടര്‍ന്ന് കഴിഞ്ഞ ദിവസം പുനലൂരില്‍നിന്ന് അമ്പലപ്പുഴ എസ്.ഐ പ്രജീഷ് കുമാറിന്റെ നേതൃത്വത്തിലുള്ള പൊലിസ് സംഘം മോഹന പണിക്കരെ അറസ്റ്റ് ചെയ്യുകയായിരുന്നു.

ഇയാള്‍ നടത്തി വന്ന സ്വകാര്യ സ്ഥാപനത്തിന് സ്വര്‍ണപ്പണയം സ്വീകരിയ്ക്കാന്‍ മാത്രമെ അഗീകാരം ഉണ്ടായിരുന്നുള്ളു. എന്നാല്‍ ഇതിന് പുറമെ സ്ഥാപനത്തില്‍ സ്ഥിരനിക്ഷേപവും ചിട്ടിയും നടത്തി വന്നിരുന്നു. ഇങ്ങനെ 3.5 കോടിയോളം രൂപ നിക്ഷേപമായി ഇവിടെ സ്വീകരിച്ചിരുന്നു. നോട്ട് നിരോധനം വന്നതോടെ വരുമാനത്തിന്റെ ഉറവിടം വെളിപ്പെടുത്താനാകാതെ പഴയ നോട്ടുകള്‍ മാറ്റിയെടുക്കാനായില്ലെന്ന് ഇയാള്‍ പൊലിസിനു നല്‍കിയ മൊഴിയില്‍ പറയുന്നു.

പഴയ നോട്ടുകള്‍സൂക്ഷിച്ചതിന്റെ പേരില്‍ കഴിഞ്ഞ ദിവസങ്ങളില്‍ പലര്‍ക്കുമെതിരെ നടപടി വന്നതോടെയാണ് നോട്ടുകള്‍ നശിപ്പിയ്ക്കാന്‍ തീരുമാനിച്ചത്. അമ്പലപ്പുഴ കോടതിയില്‍ ഹാജരാക്കിയ പ്രതിയെ റിമാന്റ് ചെയ്തു.