മനാമ: ബഹ്‌റൈനിലെ മത്സ്യത്തൊഴിലാളികളായ സഹോദരങ്ങള്‍ക്കു മുന്‍പില്‍ നേരിട്ടെത്തി റമദാന്‍ സമ്മാന പ്രഖ്യാപനം നടത്തിയ ബഹ്‌റൈന്‍ രാജകുമാരന്റെ പ്രവര്‍ത്തനം സോഷ്യല്‍ മീഡിയയില്‍ വൈറലായി.
കഴിഞ്ഞ ദിവസം ബഹ്‌റൈനിലെ ഹമദ് ടൗണിലെ റോഡരികിലാണ് സംഭവം. റോഡരികില്‍ മത്സ്യ വില്‍പനയിലേര്‍പ്പെട്ട മുഹമ്മദലി, ജാസിം എന്നീ സഹോദരങ്ങള്‍ക്കാണ് ബഹ്‌റൈന്‍ രാജാവിന്റെ മകന്‍ ഷെയ്ഖ് നാസര്‍ ബിന്‍ ഹമദ് അല്‍ ഖലീഫ നേരിട്ടെത്തി റമദാന്‍ സമ്മാനം പ്രഖ്യാപിച്ചത്.
ഇവരുമായി കുശലാന്വേഷണങ്ങള്‍ നടത്തിയ ശേഷം രണ്ടുപേരുടെയും കച്ചവടം വിപുലീകരിക്കാനും മാര്‍ക്കറ്റിനുമുതകുന്ന ബിസിനസ് ഓഫറാണ് രാജകുമാരന്‍ നല്‍കിയത്. എല്ലാ സജ്ജീകരണങ്ങളുമുള്ള ഒരു കടയും മത്സ്യവില്‍പനക്ക് ലൈസന്‍സുള്‍പ്പെടെയുള്ളവയും താന്‍ നല്‍കാമെന്നാണ് അദ്ദേഹം അറിയിച്ചത്. കൂടാതെ ബഹ്‌റൈനിലെ ലുലുവിലേയ്ക്ക് സ്ഥിരമായി മത്സ്യമെത്തിക്കാനുള്ള പ്രത്യേക അനുമതിയും അവിടെ വച്ചു നല്‍കി. കൂടെയുണ്ടായിരുന്ന ലുലു ഗ്രൂപ്പ് ഡയറക്ടര്‍ ജുസെര്‍ രൂപവാലയെ ചുമതലപ്പെടുത്തുകയും ചെയ്തു. തൊട്ടടുത്ത ദിവസം മുതല്‍ മത്സ്യത്തൊഴിലാളി സഹോദരങ്ങളില്‍ നിന്നും ലുലുവിലേക്ക് മത്സ്യം സ്വീകരിച്ചു തുടങ്ങിയതായി ലുലു അധികൃതരും പിന്നീട് അറിയിച്ചു.
അറബി ഭാഷയിലുള്ള രാജകുമാരന്റെ ഈ റമദാന്‍ സമ്മാന പ്രഖ്യാപനവും മത്സ്യത്തൊഴിലാളിയുടെ സന്തോഷ പ്രകടനങ്ങളുമുള്‍പ്പെട്ട വീഡിയോയാണ് സോഷ്യല്‍ മീഡിയയില്‍ വൈറലായിരിക്കുന്നത്.