റിയാദ്: മദ്യവില്‍പനയുമായി ബന്ധപ്പെട്ട് വീട് വാടകക്ക് എടുത്തയാളും മദ്യം വില്‍ക്കുന്ന മലയാളിയായ അയല്‍വാസിയും പൊലിസ് പിടിയിലായി. റെയ്ഡില്‍ യഥാര്‍ഥ മദ്യ വില്‍പനക്കാരന്‍ മുങ്ങിയതാണ് ഇവര്‍ക്ക് വിനയായത്. കിഴക്കന്‍ പ്രവിശ്യയിലെ വ്യാവസായിക നഗരിയായ ജുബൈലിലാണ് സംഭവം.
മലയാളികളായ വിജേഷ്, രാജേഷ് എന്നിവരാണ് പിടിയിലായത്. കെട്ടിടത്തില്‍ മദ്യ വില്‍പന നടക്കുന്നതായി വിവരം ലഭിച്ചതിന്റെ അടിസ്ഥാനത്തില്‍ സഊദി പൊലിസ് നടത്തിയ തിരച്ചിലിനിടെ പ്രതി രക്ഷപ്പെട്ടതാണ് ഇവര്‍ അഴിക്കുള്ളിലാകാന്‍ ഇടയായത്. പൊലിസെത്തിയപ്പോള്‍ റൂമില്‍ നിന്ന് മദ്യം കണ്ടെത്തിയെങ്കിലും മദ്യ വില്‍പനക്കാരന്‍ രക്ഷപ്പെടുകയായിരുന്നു. വില്‍പനയില്‍ പങ്കുണ്ടെന്നു സംശയിച്ചാണ് തൊട്ടടുത്ത മുറിയിലെ താമസക്കാരനായ തന്നെ പൊലിസ് പിടികൂടിയതെന്ന് വിജേഷ് പറഞ്ഞു.