മുസ്‌ലിം സഹോദരന്മാര്‍ നോമ്പാചരിക്കുമ്പോള്‍ അതില്‍ പങ്കാളിയാവണമെന്ന് ആഗ്രഹിക്കാറുണ്ട്. പക്ഷേ നടക്കാറില്ല. കാരണം തിരക്കൊഴിഞ്ഞ നേരം ഉണ്ടാവാറില്ല എന്നതുതന്നെ. കേവലം മതപരമായ ചടങ്ങ് എന്നതിനപ്പുറം റമദാനില്‍ വിശ്വാസികള്‍ ഒരുമാസം അനുഷ്ഠിക്കുന്ന നോമ്പിനു ഒട്ടേറെ കഴിവുണ്ടെന്നു ശാസ്ത്രലോകം തന്നെ തെളിയിച്ചിട്ടുണ്ട്. പകല്‍ മുഴുവന്‍ പട്ടിണി കിടന്ന് നോമ്പനുഷ്ഠിക്കുന്ന വിശ്വാസിക്ക് ഒരുനേരത്തെ അന്നം ലഭിക്കാതെ പട്ടിണി കിടക്കുന്നവന്റെ മനസ് വായിക്കാനാവും. അങ്ങനെ പണക്കാരനെന്നോ പാവപ്പെട്ടവനെന്നോ വ്യത്യാസമില്ലാതെ ഏതൊരു നോമ്പുകാരനും അന്നംമുട്ടുന്നവന്റെ വിലയറിയും. അതുതന്നെയാണു റമദാന്‍ ലോകത്തിനു നല്‍കുന്ന വലിയ സന്തോഷം. ശാരീരികവും മാനസികവുമായ ആരോഗ്യ സംരക്ഷണത്തിനു മനുഷ്യനെ പ്രാപ്തരാക്കുന്നതില്‍ നോമ്പ് വലിയ പങ്ക് വഹിക്കുന്നുണ്ട്.
നോമ്പുകാലത്തെ പ്രാര്‍ഥനയും സക്കാത്തും വിശ്വാസിയുടെ ശരീരത്തേയും മനസിനെയും ശുദ്ധീകരിക്കും. മറ്റുള്ളവരുടെ വേദന കണ്ടും കേട്ടുമറിഞ്ഞ് സ്വന്തം നെഞ്ചേറ്റുന്നവരാണു യഥാര്‍ഥ പൊതുപ്രവര്‍ത്തകര്‍. പ്രശ്‌നപരിഹാരത്തിനു സഹായകരമാവുന്നൊരു സമരായുധമാണ് ഉപവാസം. അത് ഏറ്റെടുക്കുന്നവര്‍ക്കു മാത്രമേ അതിന്റെ മഹത്വം മനസിലാക്കാനും അനുഭവിക്കാനും സാധിക്കൂ. നോമ്പ് അനുഷ്ഠിക്കുന്ന മുഴുവന്‍ സഹോദരന്മാര്‍ക്കും ഒപ്പമാണ് എന്റെ മനസ്.