ധര്‍മശാല: ഇന്ത്യയുടെ വിശ്വസ്തന്‍ ചേതേശ്വര്‍ പൂജാര ടെസ്റ്റ് ബാറ്റിങിലെ മറ്റൊരു റെക്കോര്‍ഡും സ്വന്തം പേരിലാക്കി. ഒരു സീസണില്‍ ഏറ്റവും കൂടുതല്‍ ടെസ്റ്റ് റണ്‍സ് സ്വന്തമാക്കുന്ന ഇന്ത്യന്‍ ബാറ്റ്‌സ്മാനായി പൂജാര മാറി.
മുന്‍ ഇന്ത്യന്‍ ഓപണര്‍ ഗൗതം ഗംഭീര്‍ എട്ടു വര്‍ഷം മുന്‍പ് സ്ഥാപിച്ച റെക്കോര്‍ഡാണു ആസ്‌ത്രേലിയക്കെതിരായ നാലാം ടെസ്റ്റില്‍ അര്‍ധ സെഞ്ച്വറി പിന്നിട്ട് പൂജാര സ്വന്തമാക്കിയത്. 2008-09 സീസണില്‍ ഗംഭീര്‍ 1269 റണ്‍സുകള്‍ നേടിയതായിരുന്നു ഇതുവരെയുള്ള റെക്കോര്‍ഡ്. നാലു റണ്‍സ് ചേര്‍ത്തു ഈ റെക്കോര്‍ഡ് പൂജാര ഇന്നലെ മറികടന്നു. ഈ സീസണില്‍ പൂജാര 1326 റണ്‍സ് നേടിയിട്ടുണ്ട്. കരിയറിലെ 15ാം ടെസ്റ്റ് അര്‍ധ ശതകം പിന്നിട്ട പൂജാര 57 റണ്‍സുമായി ലിയോണിനു വിക്കറ്റ് നല്‍കി മടങ്ങി. ഒരു സീസണില്‍ ഏറ്റവും കൂടുതല്‍ റണ്‍സെന്ന റെക്കോര്‍ഡ് മുന്‍ ഓസീസ് നായകന്‍ റിക്കി പോണ്ടിങിന്റെ പേരിലാണ്. 78.05 റണ്‍സ് ശരാശരിയില്‍ 1483 റണ്‍സാണു പോണ്ടിങ് ഒരു സീസണില്‍ നേടിയത്. ഈ റെക്കോര്‍ഡ് മറികടക്കാന്‍ പൂജാരയ്ക്ക് 168 റണ്‍സ് കൂടി വേണം.
സീസണില്‍ മിന്നും ഫോമില്‍ കളിക്കുന്ന പൂജാര ന്യൂസിലന്‍ഡ്, ഇംഗ്ലണ്ട് ഇപ്പോള്‍ ആസ്‌ത്രേലിയ ടീമുകള്‍ക്കെതിരേ ഇന്ത്യന്‍ ബാറ്റിങിന്റെ നെടുംതൂണായി നില്‍ക്കുന്നു. കിവികള്‍ക്കെതിരേ ഒരു സെഞ്ച്വറിയും മൂന്നു അര്‍ധ സെഞ്ച്വറിയും ഉള്‍പ്പെടെ 373 റണ്‍സാണു പൂജാര നേടിയത്. ഇംഗ്ലണ്ടിനെതിരേ രണ്ടു സെഞ്ച്വറികളും ഒരു അര്‍ധ സെഞ്ച്വറിയും ഉള്‍പ്പെടെ 401 റണ്‍സ്. ബംഗ്ലാദേശിനെതിരായ ഏക ടെസ്റ്റിന്റെ രണ്ടിന്നിങ്‌സിലും താരം അര്‍ധ സെഞ്ച്വറികള്‍ നേടിയിരുന്നു.
ഇപ്പോള്‍ നടന്നു കൊണ്ടിരിക്കുന്ന ഓസീസിനെതിരായ പരമ്പരയിലെ രണ്ടാം ടെസ്റ്റില്‍ പൂജാര നേടിയ അര്‍ധ സെഞ്ച്വറിയാണു ഇന്ത്യയെ വിജയത്തിലേക്കു നയിച്ചത്. മൂന്നാം ടെസ്റ്റില്‍ താരം നേടിയ ഇരട്ട സെഞ്ച്വറി ഇന്ത്യക്കു സമനിലയും സമ്മാനിച്ചു. കരിയറിലെ മൂന്നാം ഇരട്ട സെഞ്ച്വറിയാണു പൂജാര റാഞ്ചിയില്‍ നേടിയത്.